കാസർകോട് പ്രവാസിയെ വീട്ടിൽ മരിച്ച നിലയിൽ കണ്ടെത്തിയ സംഭവത്തിൽ ദുരൂഹത നീക്കാനൊരുങ്ങി പൊലീസ്. സംസ്കരിച്ച മൃതദേഹം കഴിഞ്ഞ ദിവസം പുറത്തെടുത്ത് പോസ്റ്റ്മാർട്ടം നടത്തി. വിദഗ്ധ പരിശോധനയ്ക്കായി ആന്തരികാവയവങ്ങൾ കോഴിക്കോട് ഫൊറന്സിക് ലാബിലേക്ക് അയച്ചിരിക്കുകയാണ്.
ഈ മാസം 14 ാം തീയതിയാണ് പ്രവാസി വ്യവസായിയായ എംസി അബ്ദുൽ ഗഫൂറിനെ പൂച്ചക്കാട്ടെ വീട്ടിൽ മരിച്ച നിലയിൽ കണ്ടെത്തിയത്. സ്വാഭാവിക മരണമായി കണ്ട് സംസ്ഖാരം നടത്തിയെങ്കിലും പിന്നീട് വീട്ടുകാർക്ക് സംശയം തോന്നുകയായിരുന്നു. മരണം നടന്നതിന് പിറകെ വീട്ടിൽ നിന്ന് 595 പവനോളം സ്വർണം കാണാതായെന്നാണ് വീട്ടുകാരുടെ ആരോപണം. തുടർന്ന് വീട്ടുകാർ പരാതിയുമായി പൊലീസിനെ സമീപിക്കുകയായിരുന്നു.
പരാതി ലഭിച്ചതോടെ പൊലീസ് അന്വേഷണം തുടങ്ങി. മൃതദേഹം പുറത്തെടുത്ത് പോസ്റ്റുമാർട്ടം നടത്തി.ബേക്കൽ ഡിവൈഎസ്പി സുനിൽ കുമാറിന്റെയും ആർ.ഡി.ഒയുടെയും സാന്നിധ്യത്തിലായിരുന്നു പോസ്റ്റ്മോർട്ടം നടപടികൾ. പ്രദേശത്തെ സ്വർണം ഇരട്ടിപ്പിക്കൽ സംഘത്തെ കേന്ദ്രീകരിച്ച് അന്വേഷണം നടക്കുകയാണ്. പോസ്റ്റ്മാർട്ടം റിപ്പോർട്ട് ലഭിച്ച ഷേഷം കൂടുതൽ നടപടി സ്വീകരിക്കാനാകുമെന്നാണ് പൊലീസ് പറയുന്നത്.