വാട്ടര്‍ മെട്രോ ബോട്ട് ഹൈക്കോര്‍ട്ട് ടെര്‍മിനല്‍ ജെട്ടിയില്‍ ഇടിച്ച സംഭവത്തില്‍ അന്വേഷണം പ്രഖ്യാപിച്ച് കെഎംആര്‍എല്‍. ഫോര്‍ട്ടുകൊച്ചിയില്‍നിന്ന് വന്ന വാട്ടര്‍ മെട്രോ ബോട്ട് യന്ത്രത്തകരാറിനെതുടര്‍ന്നാണ് ജെട്ടിയില്‍ ഇടിച്ചത്. ഇടിയുടെ ആഘാതത്തില്‍ യാത്രക്കാരില്‍ ചിലര്‍ക്ക് വീണ് പരിക്കേറ്റിരുന്നു. ഇവരോട് ക്ഷമാപണവും കെഎംആര്‍എല്‍ നടത്തിയിട്ടുണ്ട്.
കൊച്ചിന്‍ ഷിപ്പ്യാര്‍ഡ്, കൊച്ചി സര്‍വകലാശാല, കൊച്ചി മെട്രോ എന്നിവയിലെ സാങ്കേതിക വിദഗ്ധരെ ഉള്‍പ്പെടുത്തിയുള്ള അന്വേഷണ സംഘമാണ് രൂപികരിച്ചിരിക്കുന്നത്. അപകടമുണ്ടായ ബോട്ടിനു പുറമെ മറ്റു ബോട്ടുകളുടെയും സുരക്ഷാ പരിശോധന നടത്തും. ഇത്തരം സാഹചര്യം ആവര്‍ത്തിക്കാതിരിക്കാനുള്ള കര്‍ശന നടപടികള്‍ സ്വീകരിക്കും.
ഇതു സംബന്ധിച്ച് യാത്രക്കാര്‍ക്കുണ്ടായ പരാതികളെക്കുറിച്ചും അന്വേഷണം ഉണ്ടാകുമെന്നും കെഎംആര്‍എല്‍ അധികൃതര്‍ അറിയിച്ചു. വൈകിട്ട് 6.10 നായിരുന്നു അപകടം. ബോട്ട് അടുപ്പിക്കാനായി ക്രമീകരിച്ച പോണ്ടൂണിലാണ് ബോട്ട് ഇടിച്ചത്.
