പത്തനംതിട്ട നൗഷാദ് തിരോധാന കേസിൽ പൊലീസ് കസ്റ്റഡിയിൽ കഴിഞ്ഞിരുന്ന അഫ്സാന ജാമ്യത്തിൽ ഇറങ്ങി. കാണാതായ നൗഷാദിന്റെ ഭാര്യയാണ് അഫ്സാന. ഭര്ത്താവിനെ കൊന്നെന്നാണ് ഇവർ പൊലീസിന് മൊഴി നൽകിയിരുന്നത്. എന്നാൽ നൗഷാദ് തിരിച്ചെത്തുകയായിരുന്നു.
സംഭവത്തിൽ മൊഴി മാറ്റി കബളിപ്പിച്ചുവെന്ന കേസുമായി മുന്നോട്ടു പോകാനാണ് പൊലീസിന്റെ തീരുമാനം. നൗഷാദിനെ കൊലപ്പെടുത്തി കുഴിച്ചു മൂടിയെന്നായിരുന്നു അഫ്സാന ആദ്യം പൊലീസിന് നൽകിയ മൊഴി.ഒന്നര വര്ഷം മുന്പാണ് നൗഷാദിനെ കാണാതായത്. ഭാര്യയുടെ മൊഴി കണക്കിലെടുത്ത് പൊലീസ് പലയിടത്തും കുഴിച്ച് നോക്കിയിരുന്നു.
ഇതിനിടെ നൗഷാദിനെ ഇടുക്കി തൊമ്മന്കുത്തില്നിന്ന് കണ്ടെത്തുകയായിരുന്നു. അഫ്സാനയ്ക്ക് എതിരെ എടുത്ത കേസില് പൊലീസ് കോടതിയില് റിപ്പോര്ട്ട് നല്കും. എന്നാല് കബളിപ്പിച്ചു എന്ന കേസുമായി മുന്നോട്ടു പോകാനാണ് പൊലീസ് തീരുമാനം.നൗഷാദിനെ ജീവനോടെ കണ്ടെത്തിയതിനു പിറകെ കൂടുതല് വിവരങ്ങളും പുറത്തുവന്നിരുന്നു.
ഒന്നര വർഷം മുൻപ് അഫ്സാനയും സുഹൃത്തുക്കളും ചേർന്ന് നൗഷാദിനെ മർദ്ദിച്ച് അവശനാക്കി ഉപേക്ഷിക്കുകയായിരുന്നു. അവശ നിലയിലായ നൗഷാദിനെ ഉപേക്ഷിച്ച് ഇവര് പരുത്തിപ്പാറയിലെ വാടക വീട്ടില് നിന്ന് പോവുകയായിരുന്നു. മരിച്ചെന്ന് കരുതി ഉപേക്ഷിച്ചതാകാമെന്ന് പൊലീസ് പറയുന്നു. ഇതിന്റെ അടിസ്ഥാനത്തിലാണ് താന് നൗഷാദിനെ കൊലപ്പെടുത്തിയെന്ന് അഫ്സാന മൊഴി നൽകിയതെന്ന് പൊലീസ് പറയുന്നു.
എന്നാല് അവശനിലയിലായ നൗഷാദ് പിറ്റേ ദിവസം രാവിലെ സ്ഥലം വിടുകയായിരുന്നു. ഭാര്യയുടെ ആള്ക്കാര് സ്ഥിരമായി മര്ദിച്ചിരുന്നുവെന്നും അതിനാല് നാടുവിട്ട് ആരുമറിയാതെ ജീവിക്കുകയായിരുന്നുവെന്നുമാണ് നൗഷാദ് നല്കിയ മൊഴി. 2021 നവംബര് അഞ്ചിനാണ് നൗഷാദിനെ കാണാതായത്.