എന്ത് കുറ്റം ചെയ്താലും മാനസിക രോഗത്തിന്റെ സര്ട്ടിഫിക്കറ്റ് ഉണ്ടെങ്കില് രക്ഷപെടണമെന്നില്ലെന്ന് മാനസികാരോഗ്യ വിദഗ്ധന് ഡോ. മോഹന് റോയ്. പോക്സോ കേസില് അറസ്റ്റിലായ നടന് ശ്രീജിത്ത് രവി തനിക്ക് ഒരു രോഗമുണ്ടെന്നും നഗ്നതാ പ്രദര്ശനം നടത്താനുള്ള കാരണം അതാണെന്നും മൊഴി നല്കിയിരുന്നു.
മാനസിക രോഗമുള്ള ഒരു വ്യക്തി ആ രോഗത്തിന്റെ തീവ്രാവസ്ഥയില് ചെയ്യുന്ന കാര്യങ്ങള് നിയമത്തിന് വിരുദ്ധമാണെന്ന് തിരിച്ചറിയാന് കഴിയാതെ വരുന്ന കുറ്റകൃത്യങ്ങള് മാത്രമേ കോടതി പരിഗണിക്കുകയുള്ളൂ. എന്നാല് നടന് ശ്രീജിത്ത് രവിയുടെ കേസ് അങ്ങനെയല്ല . കോടതിയില് സര്ട്ടിഫിക്കറ്റ് കൊടുത്തിട്ട് പോലും ജാമ്യം ലഭിച്ചില്ല.
എന്ത് കുറ്റം ചെയ്താലും മാനസിക രോഗത്തിന്റെ സര്ട്ടിഫിക്കറ്റ് ഉണ്ടെങ്കില് രക്ഷപെടണമെന്നില്ല. സിനിമ ഉള്പ്പെടെയുള്ള മാധ്യമങ്ങള് കൊടുത്തിരിക്കുന്ന തെറ്റിദ്ധാരണയാണ് അതെന്ന് ഡോ. മോഹന് റോയ് ട്വന്റിഫോറിനോട് പറഞ്ഞു.
പോക്സോ കേസില് ശ്രീജിത്തിനെ 14 ദിവസത്തേക്ക് കോടതി റിമാന്ഡ് ചെയ്തു. തൃശൂര് അഡിഷന് സെഷന്സ് കോടതിയുടേതാണ് ഉത്തരവ്. ശ്രീജിത്ത് രവിക്കു ജാമ്യം നല്കരുതെന്ന് പൊലീസ് കോടതിയില് അറിയിച്ചിരുന്നു. പ്രതി മുന്പും സമാന കുറ്റം ചെയ്തിട്ടുണ്ടെന്നും ജാമ്യം തെറ്റായ സന്ദേശം നല്കുമെന്നും പൊലീസ് വ്യക്തമാക്കി.
കുട്ടികള്ക്ക് മുന്നില് നഗ്നതാപ്രദര്ശനം നടത്തിയതിന് നടന് ശ്രീജിത്ത് രവിയെ ഇന്ന് രാവിലെയാണ് പൊലീസ് അറസ്റ്റ് ചെയ്തത്. അയ്യന്തോളിലെ എസ് എന് പാര്ക്കിനു സമീപം കാര് നിര്ത്തി രണ്ട് കുട്ടികളോട് അശ്ലീല ആംഗ്യം കാണിച്ചു എന്നാണ് കേസ്. രണ്ട് ദിവസം മുന്പാണ് കേസ് രജിസ്റ്റര് ചെയ്തത്. പ്രതിക്കായി അന്വേഷണം നടത്തുകയായിരുന്നു.
സിസിടിവികള് കേന്ദ്രീകരിച്ച് നടത്തിയ അന്വേഷണത്തില് ശ്രീജിത്ത് രവിയുടെ വാഹനം പൊലീസ് തിരിച്ചറിഞ്ഞു. ഇതേ തുടര്ന്നാണ് അറസ്റ്റ്. അതേസമയം തന്റേത് ഒരു രോഗമാണെന്നും മരുന്ന് കഴിക്കാത്തത് കൊണ്ടുണ്ടായ പ്രശ്നമാണെന്നുമാണ് ശ്രീജിത്ത് പൊലീസിനോട് പറഞ്ഞിരിക്കുന്നത്.
അതേസമയം ശ്രീജിത്ത് കുട്ടികളെ വീടുവരെ പിന്തുടര്ന്നുവെന്നും അതിന് ശേഷമാണ് നഗ്നതാ പ്രദര്ശനം നടത്തിയതെന്നും കുട്ടികളുടെ പിതാവ് മാധ്യമങ്ങളോട് പറഞ്ഞു. വീട്ടുകാര് കണ്ടതിനെ തുടര്ന്ന് അയാള് കാറുമായി സ്ഥലം വിടുകയായിരുന്നെന്നും പിതാവ് പറഞ്ഞു.
നേരത്തെയും സ്കൂള് വിദ്യാര്ത്ഥിനികളോട് അപമര്യാദയായി പെരുമാറിയതിന് ശ്രീജിത്ത് രവി അറസ്റ്റിലായിട്ടുണ്ട്. 2016 ആഗസ്ത് 27നായിരുന്നു സംഭവം. സ്കൂളിലേക്ക് സംഘമായി പോകുകയായിരുന്ന പെണ്കുട്ടികള്ക്കടുത്തെത്തി കാറിന്റെ ഡ്രൈവര് സീറ്റിലിരുന്നു നഗ്നത പ്രദര്ശിപ്പിക്കുകയും കുട്ടികള് ഉള്പ്പെടുന്ന തരത്തില് സെല്ഫി എടുക്കുകയും ചെയ്തെന്നായിരുന്നായിരുന്നു പരാതി.