നിയമസഭാ തിരഞ്ഞെടുപ്പിൽ തവനൂർ മണ്ഡലത്തിൽ കെ.ടി ജലീലിനെതിരെ ഫിറോസ് കുന്നുംപറമ്പലിന് മത്സരിപ്പിക്കാൻ ആലോചന. മണ്ഡലത്തിൽ ലീഗ് മത്സരിക്കാൻ താത്പര്യം പ്രകടിപ്പിച്ചു.
കോൺഗ്രസ് നിലവിൽ മത്സരിക്കുന്ന തവനൂർ ഏറ്റെടുക്കാനാണ് ലീഗിന് താത്പര്യം. മന്ത്രി കെടി ജലീലാണ് മണ്ഡലത്തിലെ സിറ്റിംഗ് എംഎൽഎ. മുൻ ലീഗ് നേതാവായ ജലീലിനെതിരെ മത്സരിക്കണമെന്ന ആവശ്യം ലീഗിനകത്ത് ഉയർന്നിട്ടുണ്ട്.
ജില്ലയിൽ സീറ്റുകൾ വെച്ചുമാറാൻ ആലോചിച്ച് കോൺഗ്രസിലും ലീഗിലും ആലോചന. തവനൂർ, പെരിന്തൽമണ്ണ സീറ്റുകൾ പരസ്പരം വെച്ചുമാറാനാണ് ആലോചിക്കുന്നത്.
നേരത്തെ തന്നെ തവനൂർ വിട്ട് നൽകാമെന്ന നിലപാട് കോൺഗ്രസ് സ്വീകരിച്ചിരുന്നു. അതിന് പകരം വള്ളിക്കുന്ന് മണ്ഡലമാണ് കോൺഗ്രസ് ചോദിച്ചിരുന്നത്. എന്നാൽ വള്ളിക്കുന്ന് വിട്ടുതരാനാവില്ല എന്ന നിലപാടാണ് ലീഗ് സ്വീകരിച്ചത്.
അതേ സമയം കെടി ജലീൽ ഇക്കുറി മത്സരിക്കാനുണ്ടായേക്കില്ല എന്ന റിപ്പോർട്ടുകളുമുണ്ട്. രാഷ്ട്രീയത്തിൽ നിന്ന് ചെറിയ ഇടവേളയെടുത്ത് വീണ്ടും അധ്യാപക ജോലിയിലേക്ക് തിരിച്ച് പോകാൻ ജലീൽ ആഗ്രഹിക്കുന്നതാണ് കാരണമായി പറയുന്നത്.