തിരഞ്ഞെടുപ്പ് രാഷ്ട്രീയത്തില്‍ ആദിവാസി വിഭാഗങ്ങള്‍ അവഗണന നേരിടുന്നതായി ജനാധിപത്യ രാഷ്ട്രീയ സഭ സംസ്ഥാന പ്രസിഡന്റ് സികെ ജാനു. ലോക്‌സഭ തിരഞ്ഞെടുപ്പില്‍ ഒരു രാഷ്ട്രീയ മുന്നണിയും ആദിവാസി വിഭാഗത്തെ പരിഗണിക്കുന്നില്ലെന്ന് സികെ ജാനു പറഞ്ഞു. ആദിവാസി വിഭാഗത്തെ പരിഗണിക്കണമെന്നും ജാനു ആവശ്യപ്പെട്ടു.
എന്‍ഡിഎയുടെ ഘടകകക്ഷിയാണ് സികെ ജാനുവിന്റെ പാര്‍ട്ടിയായ ജനാധിപത്യ രാഷ്ട്രീയ സഭ. ലോക്‌സഭ തിരഞ്ഞെടുപ്പില്‍ മറ്റ് ഘടകകക്ഷികള്‍ക്കും സീറ്റ് നല്‍കി പരിഗണിക്കണം. എന്‍ഡിഎ യോഗത്തില്‍ ഇക്കാര്യം പരിഗണിക്കണമെന്ന് ആവശ്യപ്പെട്ടിരുന്നതായും സികെ ജാനു പറഞ്ഞു. എന്നാല്‍ പിന്നീട് ഇതേ കുറിച്ച് ചര്‍ച്ചകളോ തുടര്‍നടപടികളോ ഉണ്ടായിട്ടില്ലെന്നും ജാനു കൂട്ടിച്ചേര്‍ത്തു.
നേരത്തെ വയനാട്ടില്‍ സികെ ജാനുവിനെ എന്‍ഡിഎ സ്ഥാനാര്‍ത്ഥിയായി പ്രഖ്യാപിക്കുമെന്ന് അഭ്യൂഹങ്ങളുണ്ടായിരുന്നു. എന്നാല്‍ അതേ കുറിച്ച് താന്‍ അറിഞ്ഞത് വാര്‍ത്തകളിലൂടെയായിരുന്നെന്ന് സികെ ജാനു പ്രതികരിച്ചു. വയനാട്ടില്‍ എന്‍ഡിഎ സ്ഥാനാര്‍ത്ഥിയെ പ്രഖ്യാപിക്കാത്തത് എന്തുകൊണ്ടെന്ന് അറിയില്ലെന്നും സികെ ജാനു പറഞ്ഞു.