മ്യൂസിയത്തില് പ്രഭാത സവാരിയ്ക്കിടെ യുവതിക്ക് ലൈംഗികാതിക്രമം നേരിട്ട സംഭവത്തില് പ്രതിയെന്ന് സംശയിക്കുന്നയാള് പിടിയിലായതായി റിപ്പോര്ട്ട് . കസ്റ്റഡിയിലെടുത്ത ഇയാളെ പൊലീസ് ചോദ്യം ചെയ്ത് വരുകയാണ്. സംഭവം നടന്നിട്ട് ആറു ദിവസം പിന്നിട്ടിട്ടും പ്രതിയെ പിടികൂടാത്തതില് പൊലീസിനെതിരെ വലിയ വിമര്ശനം ഉയര്ന്നിരുന്നു.
മ്യൂസിയത്തില് രാവിലെ നടക്കാനിറങ്ങിയപ്പോള് കാറില് വന്നിറങ്ങിയ ആളാണ് തന്നെ ആക്രമിക്കാന് ശ്രമിച്ചതെന്നായിരുന്നു യുവതിയുടെ മൊഴി. വാഹനങ്ങള് കേന്ദ്രീകരിച്ച് നടത്തിയ പരിശോധനയിലാണ് പ്രതിയെക്കുറിച്ച് പൊലീസിന് സൂചന ലഭിച്ചത്.
സംഭവത്തില് സംശയമുള്ളവരെ കഴിഞ്ഞ ദിവസം പൊലീസ് സ്റ്റേഷനിലെത്തിച്ചിരുന്നു. തുടര്ന്ന് നടത്തിയ തിരിച്ചറിയല് പരേഡില് ആക്രമിച്ചയാള് ഇല്ലെന്ന് യുവതി പറഞ്ഞതോടെ അവരെ വിട്ടയക്കുകയായിരുന്നു.
താടിയുള്ള നല്ല പൊക്കവും ശരീരക്ഷമതയുമുളള ഒരാളാണ് തന്നെ ആക്രമിച്ചതെന്നായിരുന്നു സ്ത്രീയുടെ മൊഴി. ഇതനുസരിച്ച് പ്രതിയുടെ രേഖാചിത്രം കഴിഞ്ഞ ദിവസം പൊലീസ് പുറത്ത് വിട്ടിരുന്നു.
കഴിഞ്ഞ ബുധനാഴ്ചയാണ് കേസിനാസ്പദമായ സംഭവം നടക്കുന്നത്. എല്എംഎസ് ജംങ്ഷനില് വാഹനം നിര്ത്തിയിട്ട ശേഷം നടന്നുവന്നാണ് പ്രതി യുവതിയെ ആക്രമിച്ചത്. തുടര്ന്ന് മ്യൂസിയം ഗേറ്റ് ചാടിക്കടന്ന് അകത്ത് കയറി രക്ഷപ്പെട്ടു.