ആലപ്പുഴ എന്സിപിയില് ചേരിപ്പോര് രൂക്ഷം. കുട്ടനാട് എംഎല്എയക്ക് മാനസിക വിഭ്രാന്തി ആണെന്ന് പരിഹസിച്ച് അണികള് രംഗത്തെത്തി. ദേശീയ പ്രവര്ത്തക സമിതിയില് നിന്ന് തരം താഴ്ത്തപ്പെട്ട എന്സിപി നേതാവ് റെജി ചെറിയാന്റെ അനുയായിയും എന്വൈസി സംസ്ഥാന എക്സിക്യൂട്ടീവ് അംഗവുമായ പി.എ സമദ് ആണ് തോമസ് കെ തോമസ് എംഎല്എയെ അധിക്ഷേപിച്ചത്. അടുത്ത തവണ കുട്ടനാട്ടില് സീറ്റു കിട്ടുമോ എന്ന് ഉറപ്പില്ലെന്നും യുവജന നേതാവ് മാധ്യമങ്ങളോട് പറഞ്ഞു.
വിഭാഗീയ പ്രവര്ത്തനങ്ങള് നടത്തുന്നു എന്ന പരാതിയെ തുടര്ന്നാണ് ദേശീയ പ്രവര്ത്തക സമിതിയില് നിന്ന് റെജി ചെറിയാനെ ഒഴിവാക്കിയത്. ഒരു വര്ഷം മുമ്പാണ് റെജി ചെറിയാന് പാര്ട്ടിയില് എത്തിയത്. എത്തിയ ഉടനെ മുതിര്ന്ന നേതാക്കളെ ഒഴിവാക്കി അദ്ദേഹത്തെ പ്രവര്ത്തക സമിതിയിലെ അംഗമാക്കിയതില് പാര്ട്ടിക്കകത്ത് വ്യാപകമായി എതിര്പ്പുകള് ഉയര്ന്നിരുന്നു. ആലപ്പുഴ എന്സിപിയിലെ ഒരു വിഭാഗം പ്രവര്ത്തകര് റെജി ചെറിയാനൊപ്പമുണ്ട്.
അടുത്ത ജില്ലാ നേതൃയോഗത്തില് പരസ്യമായി പ്രതികരിക്കുമെന്നും തോമസ് കെ തോമസിനെതിരെ പരാതി നല്കുമെന്നും ആലപ്പുഴ എന്സിപിയിലെ ഒരു വിഭാഗം അറിയിച്ചു. അതേസമയം എംഎല്എയെ അധിക്ഷേപിച്ചതില് റെജി ചെറിയാന്റെ അനുയായികള്ക്ക് എതിരെ ശരദ്പവാറിനെ സമീപിക്കാനാണ് മറ്റൊരു വിഭാഗത്തിന്റെ നീക്കം.