മണിപ്പൂര് കലാപ കേസിലെ പ്രതിയെ കണ്ണൂരില് നിന്ന് പിടികൂടി എന്ഐഎ. കണ്ണൂര് തലശേരിയില് നിന്നാണ് ഹോട്ടലില് ജോലി ചെയ്തിരുന്ന പ്രതിയെ പിടികൂടിയത്. രാജ്കുമാര് മൈപാക് സംഘ് എന്ന മെയ്തെയ് വിഭാഗത്തിലെ യുവാവ് ആണ് പിടിയിലായത്. ഡല്ഹിയില് നിന്നുള്ള ഉദ്യോഗസ്ഥരാണ് ആരോഗ്യ പ്രവര്ത്തകരുടെ വേഷത്തിലെത്തി അറസ്റ്റ് ചെയ്തത്.
കേരള പൊലീസിനെ അറിയിക്കാതെയാണ് ഡല്ഹിയില് നിന്നുള്ള എന്ഐഎ സംഘം പ്രതിയെ പിടികൂടിയത്. രാജ്കുമാര് മൈപാക് സംഘ് കഴിഞ്ഞ മാസമാണ് കേരളത്തിലെത്തിയത്. മഴക്കാലരോഗങ്ങള് തടയാനുള്ള പരിശോധനയുടെ ഭാഗമായെന്ന് പറഞ്ഞാണ് എന്ഐഎ ഉദ്യോഗസ്ഥര് തൊഴിലാളികള് താമസിക്കുന്ന ഇടത്തെത്തിയത്.
ഓരോ തൊഴിലാളികളെയും നേരിട്ട് കണ്ട് തിരിച്ചറിയല് രേഖകള് പരിശോധിച്ചു. ആധാര്കാര്ഡും ചിത്രവും ഒത്തുനോക്കിയാണ് രാജ്കുമാറിനെ കസ്റ്റഡിയിലെടുത്തത്. ചെവിക്കുകീഴെ കഴുത്തിലായി പ്രത്യേക രീതിയില് പച്ചകുത്തിയതും എന്ഐഎക്ക് രാജ്കുമാറിനെ തിരിച്ചറിയല് എളുപ്പമാക്കി.
നിരോധിത സംഘടനയായ യുണൈറ്റഡ് നാഷണല് ലിബറേഷന് ഫ്രണ്ടില് ഇയാള് സായുധപരിശീലനം നേടിയിട്ടുണ്ടെന്നാണ് വിവരം. ഏതാനും ദിവസങ്ങളായി രാജ്കുമാറിന്റെ നീക്കങ്ങള് എന്ഐഎ നിരീക്ഷിച്ചുവരികയായിരുന്നു.