കെ.എസ്.യു നടത്തിയ സെക്രട്ടേറിയറ്റ് മാര്‍ച്ചില്‍ സംഘര്‍ഷം. സെക്രട്ടേറിയറ്റിന് മുന്നില്‍ കെ.എസ്.യു പ്രവര്‍ത്തകരും പോലീസും ഏറ്റുമുട്ടി. പൊലീസ് കണ്ണീര്‍ വാതകവും ഗ്രനേഡും പ്രയോഗിച്ചു. ഖാദര്‍ കമ്മിറ്റി റിപ്പോര്‍ട്ട് ഏകപക്ഷീയമായി നടപ്പാക്കുന്നതിനെതിരെയാണ് കെ.എസ്.യു പ്രവര്‍ത്തകര്‍ സമരം നടത്തിയത്. പോലീസിന്റെ ലാത്തിച്ചാര്‍ജില്‍ വനിതാ പ്രവര്‍ത്തകര്‍ ഉള്‍പ്പെടെയുള്ള നിരവധി പ്രവര്‍ത്തകര്‍ക്ക് പരിക്കേറ്റു.
പോലീസ് പലരെയും വളഞ്ഞിട്ട് മര്‍ദ്ദിച്ചതായും പരിക്കേറ്റവരെ ആശുപത്രിയിലെത്തിക്കാന്‍ വിസമ്മതിച്ചതായും കെ.എസ്.യു പ്രവര്‍ത്തകര്‍ ആരോപിച്ചു. വനിതാ പ്രവര്‍ത്തകരെ പുരുഷ പോലീസുകാര്‍ മര്‍ദ്ദിച്ചതായും അസഭ്യം പറഞ്ഞതായും ആരോപണമുണ്ട്. കെ.പി.സി.സി അദ്ധ്യക്ഷന്‍ മുല്ലപ്പള്ളി രാമചന്ദ്രന്‍ മാര്‍ച്ച് ഉദ്ഘാടനം ചെയ്തു.