കോവളത്ത് വിദേശ വനിതയെ ലഹരി വസ്തു നല്കി പീഡിപ്പിച്ച് കൊന്ന കേസിലെ പ്രതികള്ക്കുളള ശിക്ഷ ഇന്ന് വിധിക്കും.പ്രതികളായ ഉമേഷ്, ഉദയകുമാര് എന്നിവര് കുറ്റക്കാരാണെന്ന് തിരു. അഡീഷണല് സെഷന്സ് കോടതി വെള്ളിയാഴ്ച കണ്ടെത്തിയിരുന്നു.കൊലപാതകം, ബലാത്സംഗം, ലഹരി വസ്തു ഉപയോഗം,തെളിവ് നശിപ്പിക്കല് എന്നീ കുറ്റങ്ങളാണ് പ്രതികള്ക്കെതിരെ തെളിഞ്ഞത്.
പ്രതികള്ക്ക് പരമാവധി ശിക്ഷ നല്കണമെന്ന് പ്രോസിക്യൂഷന് ആവശ്യപ്പെടും.തിരുവനന്തപുരം റേഞ്ച് ഐജിയായിരുന്ന മനോജ് എബ്രഹാമിന്റെ നേതൃത്വത്തിലുള്ള പ്രത്യേക സംഘമാണ് പ്രതികളെ പിടികൂടിയത്.
ആയൂര്വേദ ചികിത്സക്കായി കോവളത്ത് എത്തിയ വിദേശ വനിതയെ മയക്കുമരുന്ന് നല്കി പീഡിപ്പിച്ച് കൊലപെടുത്തുകയായിരുന്നു. 2018ലാണ് സഹോദരിയോടൊപ്പം കേരളത്തില് ചികിത്സക്കെത്തിയ വിദേശ യുവതി കൊല്ലപ്പെടുന്നത്.
പോത്തന്കോട്ടെ ആയൂര്വേദ ചികിത്സാ കേന്ദ്രത്തില് നിന്നിറങ്ങി കോവളം ബീച്ചിലെത്തിയ ലാത്വിയന് യുവതിയെ ടൂറിസ്റ്റ് ഗൈഡെന്ന് തെറ്റിദ്ധരിപ്പിച്ച് പ്രതികള് ആളൊഴിഞ്ഞ കണ്ടല്ക്കാട്ടിലേക്ക് കൂട്ടിക്കൊണ്ടുപോയി, ലഹരിമരുന്ന് നല്കി പീഡിപ്പിച്ച ശേഷം കഴുത്ത് ഞെരിച്ച് കൊലപ്പെടുത്തുകയായിരുന്നു.
2018 മാര്ച്ച് 14ന് യുവതിയെ കാണാതായതിനെ തുടര്ന്ന് സഹോദരി പോലീസില് പരാതി നല്കി. ദിവസങ്ങള് നീണ്ട അന്വേഷണത്തിനൊടുവില് 37 ദിവസത്തിന് ശേഷമാണ് യുവതിയുടെ മൃതദേഹം കണ്ടെത്തിയത്.