ആക്രമണകാരികളായ 23 ഇനം വിദേശനായകളുടെ ഇറക്കുമതി, വിൽപന, പ്രജനനം എന്നിവ നിരോധിച്ച കേന്ദ്ര സർക്കാർ ഉത്തരവിൽ കേരള ഹൈക്കോടതിയുടെ ഭാഗിക സ്റ്റേ. ഇറക്കുമതി, വിൽപന എന്നിവ തടയാൻ ഇപ്പോൾ ഹൈക്കോടതി തയ്യാറായിട്ടില്ല. പകരം നായകളുടെ പ്രജനനം തടയണമെന്ന നിർദേശത്തിനാണ് സ്റ്റേ.
നായ പ്രേമികൾ നൽകിയ ഹർജിയിലാണ് നടപടി എടുത്തിരിക്കുന്നത്. വിദേശ ഇനം നായകൾക്ക് വന്ധ്യംകരണം നടത്തുമ്പോൾ അവയ്ക്ക് ആരോഗ്യപ്രശ്നങ്ങൾ ഉൾപ്പെടെയുള്ളവ ഉണ്ടാകുമെന്നാണ് നായ പ്രേമികളും നായ ഉടമകളും നൽകിയ ഹർജിയിൽ പറയുന്നത്.
നായകളെ നിലവിലുള്ള ഉടമകൾക്ക് അവയെ വീട്ടിൽ താത്കാലികമായി വളർത്താം. എന്നാൽ വന്ധ്യംകരണം ചെയ്യണോ വേണ്ടയോ എന്ന കാര്യത്തിലാണ് സ്റ്റേ ചെയ്തിരിക്കുന്നത്. കേസിൽ കേന്ദ്ര – സംസ്ഥാന സർക്കാരുകൾക്ക് ഹൈക്കോടതി നോട്ടീസ് അയച്ചിട്ടുണ്ട്.
നേരത്തെ റോട്ട്വീലര്, പിറ്റ്ബുൾ, അടക്കമുള്ള 23 വിദേശ ഇനം നായകൾക്കാണ് കേന്ദ്ര സർക്കാർ ഇറക്കുമതിയും വിൽപനയും നിരോധിച്ചത്. മനുഷ്യജീവന് അപകടകാരികൾ ആണെന്ന വിദഗ്ധ സമിതി റിപ്പോർട്ട് കണക്കിലെടുത്ത് ആയിരുന്നു കേന്ദ്ര സർക്കാരിന്റെ ഈ നടപടി.