സമ്മർദ്ദവും പരിമിതിയുമുള്ള ജഡ്ജിമാർ രാജിവെച്ച് വീട്ടിലിരിക്കണമെന്ന് ജസ്റ്റിസ് ബി. കെമാൽ പാഷ. ഡൽഹി കലാപത്തിൽ അരവിന്ദ് കെജരിവാളിന്റെ സമീപനത്തെയും കെമാൽ പാഷ രൂക്ഷമായി വിമർശിച്ചു. കേരള മനുഷ്യാവകാശ സംരക്ഷണ സമിതി കൊടുങ്ങല്ലൂർ താലൂക്ക് കമ്മിറ്റി സംഘടിപ്പിച്ച ഭരണഘടന സംരക്ഷണ സദസിൽ സംസാരിക്കുകയായിരുന്നു അദ്ദേഹം. ഡൽഹിയിലുണ്ടായ അക്രമസംഭവങ്ങൾ തടയാൻ തങ്ങൾക്കാകില്ല, തങ്ങളുടെ മേൽ സമ്മർദ്ദമുണ്ട് എന്ന സുപ്രീം കോടതി ചീഫ് ജസ്റ്റിസിന്‍റെ പ്രസ്താവനയെ കെമാൽ പാഷ വിമർശിച്ചു.
ഡൽഹിയിൽ ഇത്രയും അക്രമസംഭവങ്ങളുണ്ടായിട്ടും ഡൽഹി മുഖ്യമന്ത്രി എതിർശബ്ദം പോലും ഉയർത്താത് ജനങ്ങളോട് കാണിക്കുന്ന ചതിയാണ്. ബി.ജെ.പിയുടെ ബി. ടീമായാണ് അരവിന്ദ് കെജ്‍രിവാൾ പ്രവർത്തിക്കുന്നതെന്നും അദ്ദേഹം കുറ്റപ്പെടുത്തി. മതധ്രുവീകരണം ഉണ്ടാക്കി ജനങ്ങളെ തമ്മിലടിപ്പിക്കാൻ വേണ്ടിയാണ് പൗരത്വ നിയമ ഭേദഗതി കൊണ്ടു വന്നിരിക്കുന്നതെന്നും കെമാൽ പാഷ പറഞ്ഞു.
മനുഷ്യാവകാശ സംരക്ഷണ സമിതി കൊടുങ്ങല്ലൂർ താലൂക്ക് പ്രസിഡന്‍റ് മുഹമ്മദ് ചൂലൂക്കാരൻ, അഡ്വ. ജ്യോതിരാധിക വിജയകുമാർ, പ്രൊഫ. കുസുമം ജോസഫ്, ദിയ പർവീൺ തുടങ്ങിയവർ പങ്കെടുത്തു.