കൂടത്തായി കൊലപാതക പരമ്പരയില് പൊലീസ് പിടിയിലാകും മുമ്പ് പ്രതി ജോളി മുസ്ലിംലീഗ് ശാഖാ പ്രസിഡന്റ് ഇമ്പിച്ചി മൊയ്തീനെ വിളിച്ചതായി ഫോണ് രേഖകള്. വക്കീലിനെ ഏര്പ്പാടാക്കി നല്കണമെന്ന് ആവശ്യപ്പെട്ടിട്ടുള്ളതായിരുന്നു വിളിയെന്ന് മൊയ്തീന് പൊലീസിന് മൊഴി നല്കിയിട്ടുണ്ട്.
പിടിയിലാകുന്നത് മണത്തറിഞ്ഞ ജോളി ലീഗ് നേതാവിനെ നേരിട്ടു വന്നു കാണുകയും നിരന്തരം വിളിക്കുകയും ചെയ്തിരുന്നു. വക്കീലിനെ ഏര്പ്പാടാക്കി നല്കണമെന്നായിരുന്നു ജോളിയുടെ ആവശ്യം. വക്കീലിനെ ഏര്പ്പാടാക്കിയിരുന്നുവെങ്കിലും മറ്റൊരു വക്കീലിനെ കണ്ടുപിടിച്ചതായി തന്നോട് ജോളി പറഞ്ഞതായും അദ്ദേഹം പൊലീസിന് മുമ്പാകെ അറിയിച്ചു.
ജോളിയില് നിന്ന് അമ്പതിനായിരം രൂപ കടം വാങ്ങിയെന്ന് കഴിഞ്ഞ ദിവസം ഇമ്പിച്ചി മൊയ്തീന് പറഞ്ഞിരുന്നു. അതു തിരിച്ചു നല്കിയെന്നും അദ്ദേഹം വ്യക്തമാക്കിയിരുന്നു. ജോളി കൈക്കലാക്കിയ കുടുംബ സ്വത്തിന്റെ നികുതി അടയ്ക്കാന് താന് ശ്രമിച്ചെന്നും എന്നാല് അതിനായില്ല എന്നും അദ്ദേഹം പറഞ്ഞിരുന്നു.