ഇടുക്കി ജില്ലയിൽ വേനൽചൂടിൽ ഏലം കൃഷി വരണ്ടുണങ്ങി നശിച്ചത് സംബന്ധിച്ച് ആക്ഷൻ പ്ലാനുമായി കൃഷിവകുപ്പ്. ആക്ഷൻ പ്ലാനിന്റെ വിശദവിവരങ്ങളടങ്ങിയ റിപ്പോർട്ട് സർക്കാരിന് സമർപ്പിച്ചു. ഇക്കഴിഞ്ഞ മെയ് 16ന് ജില്ലയിലെ വരൾച്ച ബാധിത മേഖലകളിൽ സന്ദർശനം നടത്തിയ മന്ത്രി പി.പ്രസാദ് പ്രത്യേക ആക്ഷൻ പ്ലാൻ സമർപ്പിക്കാൻ നിർദേശം നൽകിയിരുന്നു.
പൂർണമായും ഭാഗികമായും കൃഷി നശിച്ചവർക്കുള്ള നഷ്ടപരിഹാരം നൽകാനുള്ള നിർദേശങ്ങൾ കൂടാതെ വരൾച്ചയെ പ്രതിരോധിക്കാനായി നടപ്പാക്കേണ്ട പദ്ധതികളും പ്ലാനിൽ വ്യക്തമാക്കിയിട്ടുണ്ട്. പുനർ നിർമിക്കേണ്ട പോളിത്തീൻ, കോൺക്രീറ്റ് ജലസംഭരണികൾ, പുതുതായി നിർമിക്കേണ്ട കുളങ്ങൾ, ജലസംഭരണികൾ എന്നിവ സംബന്ധിച്ച വിവരങ്ങളും റിപ്പോർട്ടിലുണ്ട്. ജലസേചനത്തിനായി മൈക്രോ സ്പ്രിങ്ക്ളറുകളുടെ ഉപയോഗം പരമാവധി വ്യാപിപ്പിക്കാനുള്ള നിർദേശം കൃഷി വകുപ്പ് മുന്നോട്ടു വച്ചിട്ടുണ്ട്.
വേനൽക്കാലത്ത് മണ്ണിലെ ചൂട് കുറയ്ക്കാൻ മൾച്ചിങ്(പുതയൊരുക്കൽ) സ്വീകരിക്കണം. മണ്ണ് സംരക്ഷണവുമായി ബന്ധപ്പെട്ട് കല്ല്, മണ്ണ് കയ്യാലകൾ നിർമിക്കുന്നതിന് മുൻഗണന നൽകണം. ഏലത്തോട്ടങ്ങളിൽ തണലിനായി നട്ടു വളർത്തുന്ന മരങ്ങൾ വേനൽ ചൂടിനെ പ്രതിരോധിക്കുമെന്നതിനാൽ കർഷകർ ഇക്കാര്യം ഉറപ്പ് വരുത്തണം. മഴക്കാലത്ത് ഇലപൊഴിക്കുന്ന ചില മരങ്ങൾ വേനൽക്കാലത്ത് കൃഷിയിടത്തെ വേനൽ ചൂടിൽ നിന്ന് സംരക്ഷിക്കും. ഇൻ്റഗ്രേറ്റഡ് ന്യൂട്രിഷ്യൻഡ് മാനേജ്മെന്റ്(ഐഎൻഎം), ഇൻ്റഗ്രേറ്റഡ് പെസ്റ്റ് മാനേജ്മെന്റ് എന്നിവ ഏലത്തോട്ടങ്ങളിൽ നടപ്പാക്കണമെന്നും നിർദേശമുണ്ട്.
വരൾച്ചയെ തുടർന്ന് ജില്ലയിൽ 22,311 കർഷകർക്ക് 113 കോടി രൂപയുടെ കൃഷി നാശം ഉണ്ടായതായാണ് കൃഷി വകുപ്പിന്റെ വിലയിരുത്തൽ. ഒരു വർഷം ശരാശരി 800 കിലോഗ്രാം ഏലക്കായാണ് ഒരു ഹെക്ടറിൽ നിന്നുള്ള ഉൽപാദനം. ശരാശരി ഒരു കിലോഗ്രാം ഏലക്കായുടെ വില 1600 രൂപ വച്ച് കണക്കാക്കിയാൽ ഈ വർഷം ഏലം കർഷകർക്ക് 2,869. 17 കോടി രൂപയുടെ നഷ്ടമാണ് സംഭവിച്ചത്.