ജി 20 ഉച്ചകോടിക്കെതിരെ വീ 20 കേരളയും വിവിധ സാമൂഹിക സംഘടനകളും കൊച്ചി ഗാന്ധി സ്മൃതിയില്‍ സംയുക്തമായി പ്രതിഷേധിച്ചു. കര്‍ഷകരേയും, ദലിത്- ആദിവാസി വിഭാഗങ്ങളെയും ദോഷകരമായി ബാധിക്കുന്ന സാമ്പത്തിക പരിഷ്‌കരണ പദ്ധതികള്‍ ലക്ഷ്യമിടുന്ന ജി 20 ഉച്ചകോടി ജനാധിപത്യവിരുദ്ധമാണെന്ന് വീ 20 കേരള അഭിപ്രായപ്പെട്ടു.
ജി20 ഉച്ചകോടി നിര്‍ദ്ദേശിക്കുന്ന കാര്യങ്ങള്‍ കാര്‍ഷിക മേഖലയെയും ചെറുകിട വ്യവസായങ്ങളേയും തകര്‍ക്കുന്നതാണെന്ന് വീ 20 വ്യക്തമാക്കി. ഡല്‍ഹിയില്‍ ചേരികള്‍ പൊളിക്കുകയും വഴിയോര കച്ചവടക്കാരെ ഒഴിപ്പിക്കുകയും ചെയ്തതിലൂടെ 250,000-ലധികം മനുഷ്യര്‍ക്ക് വീടുകളും ജീവനോപാധികളും നഷ്ടപ്പെട്ടതായി വീ 20 കേരള ആരോപിച്ചു.
അവകാശങ്ങളെ ഹനിക്കുകയും ചോദ്യം ചെയ്യുന്നവരെ അടിച്ചമര്‍ത്തുകയും ചെയ്യുന്ന ഭരണകൂട ഭീകരതയെ ചോദ്യം ചെയ്യുകയും പ്രതിരോധിക്കുകയും ചെയ്യേണ്ടതുണ്ടതെന്ന് കൂട്ടായ്മ അഭിപ്രായപ്പെട്ടു. സി ആര്‍ നീലകണ്ഠന്‍, ശരത് ചേലൂര്‍, ജോണ്‍ ജോസഫ്, ബാബുരാജ് എംപി, തോമസ് മാത്യു, ബിജോയ് ഡേവിഡ്, എം ഡി തോമസ്, ടിഎം സത്യന്‍, കെവി ബിജു, അഖി നന്ദിയോട്, ബാബു ജോസഫ് എന്നിവര്‍ പ്രതിഷേധ പരിപാടിയില്‍ പങ്കെടുത്തു.
