കോവിഡ് വ്യാപനം വര്‍ധിക്കുന്ന സാഹചര്യത്തില്‍ സംസ്ഥാനത്തെ സ്‌കൂളുകളുടെ പ്രവര്‍ത്തനം സംബന്ധിച്ച മാര്‍ഗരേഖ ഇന്ന് പുറത്തിറക്കും. ഇതിനായി ഇന്ന് വിദ്യാഭ്യാസ മന്ത്രിയുടെ അധ്യക്ഷതയില്‍ ഉന്നതതല യോഗം ചേരും. രാവിലെ പതിനൊന്ന് മണിക്കാണ് യോഗം.
10,11,12 ക്ലാസുകള്‍ക്കായാണ് മാര്‍ഗരേഖ തയ്യാറാക്കുന്നത്. ഓഫ്‌ലൈന്‍ ക്ലാസുകള്‍ക്കുള്ള വിശദമായ മാര്‍ഗരേഖയും ഒന്ന് മുതല്‍ ഒന്‍പത് വരെ ഉള്ള ഓണ്‍ലൈന്‍ ക്ലാസ്സുകളുടെ വിവരങ്ങളും മാര്‍ഗ രേഖയില്‍ ഉണ്ടാകും. ഉച്ചവരെ മാത്രമായിരിക്കും ക്ലാസുകള്‍. പത്താം ക്ലാസിലെ കുട്ടികള്‍ക്ക് കൂടുതല്‍ ക്ലാസ് സമയം നല്‍കാനുള്ള സാധ്യതയുണ്ട്. എസ്.എസ്.എല്‍.സി പാഠഭാഗങ്ങള്‍ ഫെബ്രുവരി ആദ്യവാരവും പ്ലസ്ടു പാഠഭാഗങ്ങള്‍ ഫെബ്രുവരി അവസാന വാരവും പൂര്‍ത്തിയാക്കും.
രോഗ വ്യാപനം രൂക്ഷമാകുന്ന സാഹചര്യത്തില്‍ നിയന്ത്രണങ്ങള്‍ ശക്തമാക്കും. സ്‌കൂളില്‍ എത്തുന്ന വിദ്യാര്‍ത്ഥികള്‍ക്കായി പ്രത്യേക സുരക്ഷാ ക്രമീകരണങ്ങള്‍ ഒരുക്കും ഓണ്‍ലൈന്‍ ക്ലാസുകള്‍ എത്ര നാള്‍ തുടരണം എന്ന് ഫെബ്രുവരിയില്‍ പരിശോധിക്കും. പ്രാക്ടിക്കല്‍ ക്ലാസുകളിലെ പഠനരീതി സംബന്ധിച്ചും നിര്‍ദ്ദേശം ഉണ്ടാകും.
സംസ്ഥാനത്ത് ബുധനാഴ്ച മുതല്‍കുട്ടികള്‍ക്കായുള്ള വാക്‌സിനേഷന്‍ സ്‌കൂളുകളില്‍ ആരംഭിക്കും. ഇതിനോടകം 50 ശതമാനത്തിലധികം കുട്ടികള്‍ക്ക് ഒന്നാം ഘട്ട വാകസിന്‍ നല്‍കിയതായി ആരോഗ്യവകുപ്പ് അറിയിച്ചു.