മുന് മന്ത്രിയും കോണ്ഗ്രസ് നേതാവുമായ വിഎസ് ശിവകുമാറിനെതിരെ നിക്ഷേപ തട്ടിപ്പില് കേസെടുത്ത് തിരുവനന്തപുരം കരമന പൊലീസ്.
അണ് എംപ്ലോയീസ് സോഷ്യല് വെല്ഫയര് കോ ഓപ്പറേറ്റീവ് സൊസൈറ്റിയിലെ നിക്ഷേപ തട്ടിപ്പ് കേസിലാണ് വിഎസ് ശിവകുമാറിനെ മൂന്നാം പ്രതിയാക്കി കരമന പൊലീസ് കേസ് രജിസ്റ്റര് ചെയ്തത്.
നിക്ഷേപകരുടെ പരാതിയുടെ അടിസ്ഥാനത്തിലാണ് പൊലീസ് കേസെടുത്തിരിക്കുന്നത്. 300 പേര്ക്ക് 13 കോടി രൂപ നഷ്ടമായതായാണ് പരാതി. നിക്ഷേപകര് ഇത് സംബന്ധിച്ച് നേരത്തേ മുഖ്യമന്ത്രിയ്ക്കും ഡിജിപിയ്ക്കും പരാതി നല്കിയിരുന്നു. പരാതിയില് അന്വേഷണം പുരോഗമിക്കുന്നതിനിടെയാണ് ശാന്തിവിള സ്വദേശിയായ നിക്ഷേപകന് മധുസൂദനന് കരമന പൊലീസില് നല്കിയ പരാതിയിലാണ് നടപടി.
പത്ത് ലക്ഷം രൂപയാണ് മധുസൂദനന് അണ് എംപ്ലോയീസ് സോഷ്യല് വെല്ഫയര് കോ ഓപ്പറേറ്റീവ് സൊസൈറ്റിയില് നിക്ഷേപിച്ചിരുന്നത്. ശിവകുമാര് പറഞ്ഞത് പ്രകാരമാണ് താന് പണം നിക്ഷേപിച്ചതെന്നാണ് മധുസൂദനന് പരാതിയില് പറയുന്നത്. ബാങ്ക് പ്രസിഡന്റ് രാജേന്ദ്രന് ആണ് കേസിലെ ഒന്നാം പ്രതി. രാജേന്ദ്രന് സുനില്കുമാറിന്റെ ബിനാമിയാണെന്ന് നിക്ഷേപകര് മുന്പ് ആക്ഷേപം ഉന്നയിച്ചിരുന്നു.
നേമം, വെള്ളായണി, കിള്ളിപ്പാലം എന്നിവിടങ്ങളില് സൊസൈറ്റിയ്ക്ക് ശാഖകള് ഉണ്ടായിരുന്നു. മൂന്ന് ശാഖകളിലായി പണം നിക്ഷേപിച്ചവര്ക്കാണ് പണം നഷ്ടമായതായി പരാതിയുള്ളത്. നേരത്തേ വിഎസ് ശിവകുമാറിന്റെ വീടിന് മുന്നിലും നിക്ഷേപകര് പ്രതിഷേധം നടത്തിയിരുന്നു. എന്നാല് തനിക്ക് രാജേന്ദ്രനുമായി യാതൊരു ബന്ധവുമില്ലെന്നും സൊസൈറ്റിയുടെ ഉദ്ഘാടനം മാത്രമാണ് താന് നടത്തിയതെന്നുമായിരുന്നു അന്ന് വിഎസ് ശിവകുമാര് പ്രതികരിച്ചത്.