കൊച്ചി കളമശേരിയില് ഫെറാരി സ്പോര്ട്സ് കാര് അപകടത്തില്പ്പെട്ടു. കളമശേരി മെഡിക്കല് കോളേജ് റോഡിലാണ് അപകടമുണ്ടായത്. മറ്റൊരു വാഹനത്തെ മറികടക്കാന് ശ്രമിക്കുന്നതിനിടെ നിയന്ത്രണം നഷ്ടപ്പെട്ട ഫെറാരി കാര് മരത്തിലിടിക്കുകയായിരുന്നു. അപകടത്തില് ആര്ക്കും പരിക്കുകളില്ലെന്നാണ് പുറത്തുവരുന്ന വിവരം.
ഫെറാരിയുടെ മിഡ് എന്ജിന് സ്പോര്ട്സ് കാറായ 488 ജിടിബിയാണ് അപകടത്തില്പ്പെട്ടത്. 2015 മുതല് 2019 വരെയാണ് ഈ കാര് കമ്പനി പുറത്തിറക്കിയത്. ഏകദേശം അഞ്ച് കോടി രൂപയാണ് ഈ വാഹനം ഇറങ്ങിയ സമയത്തെ ഓണ് റോഡ് വില. 3.9 ലിറ്റര് ട്വിന് ടര്ബോ ചാര്ജ്ഡ് വി 8 എഞ്ചിനാണ് വാഹനത്തിലുള്ളത്.
മണിക്കൂറില് 330 കിലോമീറ്ററാണ് കാറിന്റെ ഏറ്റവും ഉയര്ന്ന വേഗത. ഫെറാരി 458ന് പകരക്കാരനായാണ് ഈ കാര് കമ്പനി പുറത്തിറക്കിയത്.