ഇപി ജയരാജന്റെ ആത്മകഥാ വിവാദത്തില് വിശദമായ അന്വേഷണം നടത്താൻ പൊലീസ്. വിഷയത്തില് ഡിസി ബുക്സിന്റെ മാനേജിങ് ഡയറക്ടർ രവി ഡിസിയുടെ മൊഴി രേഖപ്പെടുത്തും. ഷാര്ജയിലുള്ള രവി മടങ്ങിയെത്തിയാലുടനെ മൊഴിയെടുക്കാനാണ് പൊലീസിന്റെ തീരുമാനം. ആത്മകഥ പ്രസിദ്ധീകരിക്കുന്നതിനുള്ള കരാറിനെ സംബന്ധിച്ച് ഡിസി ബുക്സിലെ രണ്ട് ജീവനക്കാരുടെ മൊഴി ഇതിനോടകം പൊലീസ് രേഖപ്പെടുത്തിയിട്ടുണ്ട്.
ആത്മകഥ പ്രസിദ്ധീകരിക്കുന്നതുമായി ഇപി ജയരാജനും ഡിസി ബുക്സും തമ്മില് കരാറുണ്ടോയെന്ന കാര്യവും പൊലീസ് പരിശോധിക്കും. കരാറുമായി ബന്ധപ്പെട്ടുള്ള കാര്യങ്ങള് തങ്ങള്ക്കറിയില്ലെന്ന മൊഴിയാണ് ഈ ജീവനക്കാര് നല്കിയതെന്നാണ് വിവരം. രവി ഡിസിയില് നിന്ന് ഇതുസംബന്ധിച്ച കൂടുതല് വിശദീകരണം തേടാനാണ് പൊലീസിന്റെ തീരുമാനം. പിഡിഎഫ് ചോര്ന്നതിനേ കുറിച്ചും പൊലീസ് അന്വേഷണം നടത്തും. മാധ്യമ പ്രവര്ത്തകരില് നിന്നടക്കം വിവരങ്ങള് ശേഖരിക്കാനാണ് പൊലീസ് ഒരുങ്ങുന്നത്. പിഡിഎഫ് ആര്ക്കൊക്കെ എവിടെ നിന്ന് ലഭിച്ചു എന്നുള്ളത് കണ്ടെത്താനാണ് പോലീസ് ശ്രമിക്കുന്നത്.
ഇപി ജയരാജന്റെ മൊഴിയും ഇക്കാര്യത്തില് നിര്ണായകമാണ്. മൊഴി നല്കാനായി ഇപി ജയരാജന് കൂടുതല് സമയം തേടിയിട്ടുണ്ട്. വിഷയത്തില് ഒരു പ്രാഥമികാന്വേഷണമാണ് ഇപ്പോള് നടക്കുന്നത്. ആത്മകഥാ വിവാദത്തില് ഇപി ജയരാജന് ഡിജിപിയ്ക്ക് പരാതി നല്കിയിരുന്നു. തനിക്കെതിരേ ഗൂഢാലോചന നടത്തി, തെറ്റായ വിവരങ്ങള് പ്രചരിപ്പിച്ചു എന്നാണ് ഇപി ജയരാജന് ഇ-മെയില് വഴി നല്കിയ പരാതിയില് പറയുന്നത്.