പിണറായി സർക്കാരിന്റെ കാലത്ത് ഏറെ വിവാദമായ പി എം ശ്രീ പദ്ധതിയുമായി മുന്നോട്ടുപോകാമെന്ന് പൊതുവിദ്യാഭ്യാസ ഡയറക്ടറുടെ റിപ്പോര്ട്ട്. വിദ്യാഭ്യാസ നയം മാറ്റേണ്ടി വരില്ലെന്നും റിപ്പോർട്ടിൽ പറയുന്നു. കേന്ദ്ര നിബന്ധനകളിലെ എസ്എസ്കെ ഫണ്ട് സംസ്ഥാനത്തിന് അനിവാര്യമാണെന്നും പദ്ധതിയുമായി മുന്നോട്ട് പോയില്ലെങ്കില് ഈ ഫണ്ടുകള് ലഭ്യമാകില്ലെന്നും റിപ്പോര്ട്ടില് ചൂണ്ടിക്കാട്ടുന്നു. പൊതുവിദ്യാഭ്യാസ ഡയറക്ടര് വിദ്യാഭ്യാസ മന്ത്രി എന് ഷംസുദ്ദീന് നല്കിയ റിപ്പോര്ട്ടിലാണ് ഇക്കാര്യങ്ങളുള്ളത്.
പൊതു വിദ്യാഭ്യാസ ഡയറക്ടര് നല്കിയ റിപ്പോര്ട്ടില് അന്തിമ തീരുമാനമെടുക്കുന്നത് സംസ്ഥാന സര്ക്കാരാണ്. അതേസമയം പി എം ശ്രീ വിഷയത്തില് പെട്ടെന്ന് തീരുമാനം എടുക്കാന് സാധിക്കില്ലെന്നും വിദഗ്ധരുമായുള്ള ചര്ച്ചകള് ഉള്പ്പെടെ അനിവാര്യമാണെന്നും വിദ്യാഭ്യാസവകുപ്പ് മന്ത്രി എന് ഷംസുദ്ദീന് പറഞ്ഞു. സാമ്പത്തിക കാര്യങ്ങള് ഉള്പ്പെടെയുള്ള റിപ്പോര്ട്ടുകള് പരിഗണിച്ച് അന്തിമ തീരുമാനം എടുക്കും. കേന്ദ്ര-സംസ്ഥാന സര്ക്കാരുകള് ഒപ്പിട്ട കരാറുണ്ടെന്നും കഴിഞ്ഞ സര്ക്കാര് ഒപ്പിട്ട് ഫണ്ട് വാങ്ങിയതാണെന്നും എന് ഷംസുദ്ദീന് പറഞ്ഞു.
പി എം ശ്രീയുമായി മുന്നോട്ടുപോകാന് രണ്ടാം പിണറായി സര്ക്കാര് ആദ്യ ഘട്ടത്തില് ശ്രമം നടത്തിയെങ്കിലും മുന്നണിയില് നിന്ന് ഉള്പ്പെടെ വന്ന എതിര്പ്പുകള് അന്നത്തെ വിദ്യാഭ്യാസ വകുപ്പിനെ വന് പ്രതിരോധത്തിലാക്കുകയും അവര് അതില് നിന്ന് പിന്നോട്ടുപോകുകയുമായിരുന്നു. 2025 ഒക്ടോബര് 16ന് മന്ത്രിസഭയോ മുന്നണിയോ അറിയാതെ അന്നത്തെ വിദ്യാഭ്യാസ മന്ത്രിയും അന്നത്തെ മുഖ്യമന്ത്രിയും മുന്കൈയെടുത്താണ് പിഎം ശ്രീയില് ഒപ്പിട്ടതെന്നത് വിവാദമായിരുന്നു.
വിദ്യാഭ്യാസനയം മാറ്റേണ്ടി വരുമെന്ന ആശങ്കകളായിരുന്നു അന്ന് പ്രധാനമായും ചര്ച്ചയായിരുന്നത്. ഈ പശ്ചാത്തലത്തിലാണ് വിദ്യാഭ്യാസ നയം മാറ്റേണ്ടി വരില്ലെന്ന ഉറപ്പുമായി പൊതുവിദ്യാഭ്യാസ ഡയറക്ടറുടെ റിപ്പോര്ട്ട് പുതിയ വിദ്യാഭ്യാസമന്ത്രിക്ക് മുന്പാകെ എത്തിയിരിക്കുന്നത്. സര്ക്കാര് ഇക്കാര്യത്തില് എന്ത് തീരുമാനമെടുക്കുമെന്ന് അറിയാന് ഉറ്റുനോക്കുകയാണ് സംസ്ഥാനം. നിലവിലെ എസ്സിഇആര്ടി പുസ്തകം തന്നെ കുട്ടികളെ പഠിപ്പിച്ചാല് മതിയെന്നാണ് റിപ്പോര്ട്ടിലുള്ളത്.