കേരളത്തില്‍ പൗരത്വ ഭേദഗതി ബില്ല് നടപ്പാക്കില്ലെന്ന മുഖ്യമന്ത്രി പിണറായി വിജയന്റെ പ്രസ്താവനയെ കടന്നാക്രമിച്ച് തൃശൂരിലെ ബിജെപി സ്ഥാനാര്‍ത്ഥിയും നടനുമായ സുരേഷ് ഗോപി. പിണറായി വിജയന്‍ കേരളത്തിന്റെ കാര്യം മാത്രം നോക്കിയാല്‍ മതിയെന്നും രാജ്യത്തേക്ക് ആര് വരണം പോകണമെന്ന് നോക്കേണ്ട കാര്യമില്ലെന്നും സുരേഷ്‌ഗോപി പറഞ്ഞു.
കഴിഞ്ഞ ദിവസം ഗുരുവായൂരില്‍ നടന്ന റോഡ് ഷോയ്ക്കിടെയായിരുന്നു സുരേഷ് ഗോപി പിണറായി വിജയനെ വിമര്‍ശിച്ചത്. ക്ഷേത്രങ്ങളും പരിസര പ്രദേശങ്ങളും കേന്ദ്രീകരിച്ചായിരുന്നു കഴിഞ്ഞ ദിവസത്തെ പ്രചരണ പരിപാടി. കേരളത്തില്‍ നിലവില്‍ ഭരണവിരുദ്ധ വികാരമുണ്ട്. പ്രചരണ സമയത്ത് ജനങ്ങളുടെ പെരുമാറ്റത്തില്‍ അത് പ്രതിഫലിച്ചെന്നും സുരേഷ് ഗോപി കൂട്ടിച്ചേര്‍ത്തു.
ഈ തിരഞ്ഞെടുപ്പില്‍ ബിജെപിയുടെ വോട്ട് ശതമാനം വര്‍ദ്ധിക്കും. താന്‍ വിജയിച്ചാല്‍ തൃശൂരില്‍ എലിവേറ്റഡ് ഹൈവേ യാഥാര്‍ത്ഥ്യമാക്കുമെന്നും സുരേഷ് ഗോപി അറിയിച്ചു. ഭാരത് റൈസിന് ബദലായി സംസ്ഥാന സര്‍ക്കാര്‍ ഇറക്കുന്ന ശബരി കെ റൈസിനെ കുറിച്ച് ചോദിച്ചപ്പോള്‍ ജനങ്ങള്‍ക്ക് അങ്ങനെയെങ്കിലും അരി നല്‍കട്ടെ എന്നായിരുന്നു സുരേഷ് ഗോപി അഭിപ്രായപ്പെട്ടത്.