മദ്യവില വര്ദ്ധിപ്പിക്കാനുള്ള സര്ക്കാര് തീരുമാനം അശാസ്ത്രീയവും നേരിട്ടോ അല്ലാതെയോ സാധാരണക്കാരുടെ കുടുംബ ബജറ്റിനെ താളം തെറ്റിക്കുന്നതുമാണെന്ന് പ്രതിപക്ഷ നേതാവ് വി.ഡി സതീശന്. ലഹരിവിരുദ്ധ കാമ്പയിന് നടത്തുന്ന സര്ക്കാര് തന്നെ മയക്കുമരുന്ന് വ്യാപനത്തിന് വഴിമരുന്നിടുന്നത് ദൗര്ഭാഗ്യകരമാണെന്നും സര്ക്കാര് ഇന്സെന്റീവ് നല്കിയിരുന്നെങ്കില് പാല് വില വര്ദ്ധന ഒഴിവാക്കാമായിരുന്നുവെന്നും പ്രതിപക്ഷ നേതാവ് പറഞ്ഞു.
മദ്യവില അമിതമായി വര്ദ്ധിപ്പിക്കുന്നത് മാരക ലഹരി വസ്തുക്കളിലേക്ക് വഴിതിരിച്ച് വിടുമെന്ന യാഥാര്ത്ഥ്യവും സര്ക്കാര് കാണാതിരിക്കരുത്. മദ്യവില കൂട്ടിയാലും ഉപഭോഗം കുറയില്ലെന്നതാണ് നമുക്ക് മുന്നിലുള്ള യാഥാര്ത്ഥ്യം. അതുകൊണ്ടു തന്നെ മദ്യപിക്കുന്നവര്ക്ക് തന്റെ വരുമാനത്തിലൈ നല്ലൊരു ഭാഗം മദ്യത്തിനായി നല്കേണ്ടി വരും. ഇത് വീട്ടുചെലവിനും കുട്ടികളുടെ വിദ്യാഭ്യാസത്തിനുമായി നീക്കി വയ്ക്കുന്ന തുകയില് കുറവുണ്ടാക്കുകയും കുടുംബങ്ങളെ അരക്ഷിതാവസ്ഥയിലേക്ക് തള്ളി വിടുകയും ചെയ്യുന്ന സാഹചര്യമുണ്ടാക്കും.
മദ്യ കമ്പനികള് നല്കേണ്ടിയിരുന്ന അഞ്ച് ശതമാനം വിറ്റുവരവ് നികുതി ഒഴിവാക്കിയതിനെ തുടര്ന്നുണ്ടാകുന്ന 150 കോടി രൂപയുടെ വരുമാന നഷ്ടം പരിഹരിക്കാനാണ് മദ്യവില കൂട്ടാന് സര്ക്കാര് തീരുമാനിച്ചിരിക്കുന്നത്. ഇപ്പോഴത്തെ വര്ധന കൂടിയാകുമ്പോള് വിദേശ മദ്യത്തിനുള്ള വില്പന നികുതി 247 ശതമാനത്തില് നിന്നും 251 ശതമാനമായി വര്ദ്ധിക്കും.
മദ്യ ഉപഭോക്താവിന് ഇരുട്ടടിയാകുന്ന ഈ വര്ദ്ധനവ് മദ്യ കമ്പനികളെ സഹായിക്കാന് വേണ്ടി മാത്രമാണ്. ഇത് പകല്ക്കൊള്ളയാണെന്നതില് തര്ക്കമില്ല. വന്കിട മദ്യകമ്പനികള്ക്കു വേണ്ടി വിറ്റുവരവ് നികുതി ഒഴിവാക്കിക്കൊടുക്കാന് സി.പി.എം നേതാക്കള് ഇടപെട്ടെന്ന ആരോപണവും ഉയര്ന്നിട്ടുണ്ട്. ഇതേക്കുറിച്ച് അന്വേഷണം വേണമെന്നും വി ഡി സതീശന് വാര്ത്താക്കുറിപ്പില് പറഞ്ഞു.