കണക്ഷൻ തകരാറിലായതിനെതുടർന്ന് മൈക്ക് ഒഴിവാക്കി വാർത്താസമ്മേളനം നടത്തി മുഖ്യമന്ത്രി പിണറായി വിജയൻ. അടൂരിലെ വൈറ്റ് പോര്ട്ടിക്കോ ഹോട്ടലിലായിരുന്നു വാർത്താസമ്മേളനം. സമ്മേളനം തുടങ്ങി എട്ടാം മിനിറ്റിൽത്തന്നെ മൈക്ക് കണക്ഷൻ തകരാറിലായി. ജീവനക്കാർ നന്നാക്കാൻ ശ്രമിച്ചെങ്കിലും ശരിയാവാതെ വന്നതോടെയാണ് മുഖ്യമന്ത്രിയുടെ നടപടി.
വാർത്താസമ്മേളനത്തിൻ്റെ തുടക്കം മുതൽ സ്പീക്കറിൽ പ്രശ്നമുണ്ടായിരുന്നു. മുഖ്യമന്ത്രി സംസാരിക്കുമ്പോള് ഒപ്പം കണക്ഷന് തകരാര് മൂലമുള്ള അപശബ്ദവും കയറിവന്നു. അധികൃതര് നന്നാക്കാന് നോക്കിയെങ്കിലും ശരിയായില്ല. തുടര്ന്ന് മുഖ്യമന്ത്രിതന്നെ മൈക്ക് ഓഫ് ചെയ്ത് പത്രസമ്മേളനം തുടരുകയായിരുന്നു.
അതേസമയം കഴിഞ്ഞ ദിവസം കോട്ടയത്തും മുഖ്യമന്ത്രി പ്രസംഗിക്കുന്നതിനിടെ മൈക്ക് ഒടിഞ്ഞു വീണിരുന്നു. എൽഡിഎഫ് സ്ഥാനാർഥി തോമസ് ചാഴികാടന്റെ തിരഞ്ഞെടുപ്പ് പ്രചാരണ കൺവെൻഷൻ തലയോലപ്പറമ്പ് പള്ളിക്കവലയിൽ നടക്കുന്നതിനിടെയായിരുന്നു സംഭവം.
പ്രസംഗത്തിനിടെ മൈക്ക് അപസ്വരമുണ്ടാക്കി. തുടർന്ന് മൈക്ക് മുഖത്തോട് അടുപ്പിക്കാൻ മുഖ്യമന്ത്രി പിണറായി വിജയൻ ശ്രമിക്കുന്നതിനിടെ സ്റ്റാൻഡ് ഒടിഞ്ഞു വീഴുകയായിരുന്നു. പ്രസംഗ പീഠത്തിലെ സ്റ്റാൻഡിൽ മൈക്ക് ഉറപ്പിച്ച ശേഷം മുഖ്യമന്ത്രി പ്രസംഗം തുടരുന്നതിനിടെ ആംപ്ലിഫയറിൽനിന്ന് വീണ്ടും പുകയും കരിഞ്ഞ മണവും ഉയർന്നു. 2 തവണയാണ് മുഖ്യമന്ത്രിയുടെ പ്രസംഗം തടസ്സപ്പെട്ടത്.