പി.എസ്.സി റാങ്ക് ലിസ്റ്റിന്റെ കാലാവധി നീട്ടാനാവില്ലെന്ന് മുഖ്യമന്ത്രി പിണറായി വിജയൻ നിയമസഭയിൽ അറിയിച്ചു. സാധാരണ ഗതിയില് ഒരു പി.എസ്.സി റാങ്ക്ലിസ്റ്റിന്റെ കാലാവധി ഒരു വര്ഷമാണ്. ഒരു വര്ഷത്തിനിടയില് പുതിയ റാങ്ക് ലിസ്റ്റ് നിലവില് വന്നിട്ടില്ലെങ്കില് പുതിയ റാങ്ക് ലിസ്റ്റ് പ്രസിദ്ധീകരിക്കുന്നതു വരെയോ, മൂന്നു വര്ഷമോ ഏതാണോ ആദ്യം അതുവരെ റാങ്ക് ലിസ്റ്റിന് കാലാവധിയുണ്ടാവും. ഈ വ്യവസ്ഥ യൂണിഫോമ്ഡ് ഫോര്സിന് ബാധകമല്ല. ഓഗസ്റ്റ് 4- ന് അവസാനിക്കുന്ന എല്ലാ റാങ്കുലിസ്റ്റുകളും മൂന്നു വര്ഷത്തെ കാലാവധി കഴിഞ്ഞവയാണെന്നും മുഖ്യമന്ത്രി പറഞ്ഞു.
അതേസമയം പി എസ് സിയെ കരുവന്നൂർ സഹകരണ ബാങ്കിന്റെ നിലവാരത്തിലേക്ക് താഴ്ത്തരുതെന്നും അതിനെ പാർട്ടി സർവീസ് കമ്മീഷനാക്കരുതെന്നും ഷാഫി പറമ്പിൽ എംഎൽഎ സഭയിൽ പറഞ്ഞു. അഡ്മിനിസ്ട്രേറ്റീവ് ട്രിബ്യൂണൽ വിധിക്കെതിരെ എന്തിനാണ് പി എസ് സി അപ്പീൽ പോയത്. അതിന് എന്തിനാണ് സർക്കാർ പിന്തുണ നൽകുന്നത്. സർക്കാർ ഉദ്യോഗാർത്ഥികളോട് പ്രതികാര നടപടി എടുക്കുകയാണ്. സർക്കാരിന് പിടിവാശിയാണെന്നും ഷാഫി ആരോപിച്ചു.
എന്നാൽ, പി.എസ്.സി റാങ്ക് ലിസ്റ്റുകളുടെ കാലാവധിക്കുള്ളില് ലഭ്യമാകുന്ന മുഴുവന് ഒഴിവുകളിലും നിയമനം നടത്തുകയെന്നതാണ് സര്ക്കാരിന്റെ പ്രഖ്യാപിതനയം എന്ന് മുഖ്യമന്ത്രി പറഞ്ഞു. ഇതിനാവശ്യമായ സത്വരനടപടികള് സര്ക്കാരും നിയമനാധികാരികളും പി.എസ്.സിയും സ്വീകരിക്കുന്നുണ്ട്. റിക്രൂട്ട്മെന്റ്, പിഎസ്സി പരീക്ഷ നടത്തിപ്പ്, റാങ്ക്ലിസ്റ്റ് തയ്യാറാക്കല്, റാങ്ക്ലിസ്റ്റുകളുടെ കാലാവധി, ഉദ്യോഗാര്ത്ഥികളെ ശിപാര്ശ ചെയ്യല് തുടങ്ങിയവ പി.എസ്.സി.യുടെ ഭരണഘടനാദത്തമായ അധികാര പരിധിയിലാണ്. ഇക്കാര്യങ്ങള് പി.എസ്.സി റൂള്സ് ഓഫ് പ്രൊസിജ്യുറിലാണ് വ്യവസ്ഥ ചെയ്യുന്നത്. ഇതില് ചട്ടം 13 ആണ് പി.എസ്.സി റാങ്ക്ലിസ്റ്റുകളുടെ കാലാവധി പരാമര്ശിക്കുന്നത്.
കോവിഡിനെ തുടര്ന്ന് യഥാസമയം മത്സരപരീക്ഷകള് നടത്താന് പി.എസ്.സിക്ക് കഴിയാത്ത സാഹചര്യമുണ്ടായി. എന്നാല് ഒഴിവുകള് റിപ്പോര്ട്ട് ചെയ്യുന്നതിനെയും നിയമന ശിപാര്ശ നല്കുന്നതിനെയും ഇത് ബാധിക്കുന്നില്ല. കോവിഡ് സാഹചര്യത്തില് ഒഴിവുകള് ഉണ്ടാകുന്ന കാര്യത്തിലോ, ഒഴിവുകള് പി.എസ്.സിക്ക് റിപ്പോര്ട്ട് ചെയ്യുന്ന കാര്യത്തിലോ ഒരു തടസ്സവും ഉണ്ടായിട്ടില്ല. മാത്രവുമല്ല, ഒഴിവുകള് പി.എസ്.സി.ക്ക് റിപ്പോര്ട്ട് ചെയ്യാന് സര്ക്കാര് എല്ലാ നടപടികളും സ്വീകരിച്ചിട്ടുണ്ട്. 05.02.2021നും 03.08.2021-നുമിടയില് കാലാവധി പൂര്ത്തിയാകുന്ന വിവിധ റാങ്ക് ലിസ്റ്റുകളുടെ കാലാവധി 04.08.2021 വരെ ദീര്ഘിപ്പിച്ച് നല്കിയിട്ടുമുണ്ട്.
ചട്ടം 13 പ്രകാരം റാങ്ക്ലിസ്റ്റുകളുടെ കാലാവധി മൂന്നു വര്ഷത്തിലധികം നീട്ടുന്നതിന് ചില നിബന്ധനകളുണ്ട്: നിയമനനിരോധനം നിലവിലുണ്ടായിരിക്കുക. ഒഴിവുകള് റിപ്പോര്ട്ട് ചെയ്യുന്നതിന് നിയമനാധികാരികള്ക്ക് നിയന്ത്രണമോ കാലതാമസമോ തടസ്സമോ നേരിടുന്ന അസാധാരണ സാഹചര്യം എന്നിവ. ഇത്തരം സാഹചര്യങ്ങളില് മാത്രമാണ് റാങ്ക് ലിസ്റ്റുകളുടെ കാലാവധി നീട്ടാന് സര്ക്കാര് പി.എസ്.സിയോട് ശിപാര്ശ ചെയ്യാറുള്ളത്. കഴിഞ്ഞ എല്.ഡി.എഫ് സര്ക്കാരിന്റെ കാലത്തോ ഈ സര്ക്കാരിന്റെ കാലത്തോ പി.എസ്.സിക്ക് ഒഴിവുകള് റിപ്പോര്ട്ട് ചെയ്യുന്നതിന് ഒരു നിയന്ത്രണവും ഏര്പ്പെടുത്തിയിരുന്നില്ല. ഒഴിവുകള് റിപ്പോര്ട്ട് ചെയ്യാതിരിക്കുന്ന നിയമനാധികാരികള്ക്കെതിരെ നടപടി സ്വീകരിക്കുമെന്നാണ് സര്ക്കാര് എടുത്ത നിലപാട്. അതിനാല് റാങ്ക് ലിസ്റ്റുകള് വീണ്ടും നീട്ടാനുള്ള സാഹചര്യം ഇപ്പോള് നിലവിലില്ല.
റാങ്ക് ലിസ്റ്റുകളുടെ കാലാവധി ഓഗസ്റ്റ് 4-ന് അവസാനിക്കുന്നത് കണക്കിലെടുത്ത് അതുവരെയുള്ള മുഴവന് ഒഴിവുകളും നിയമനാധികാരികള് പി.എസ്.സിക്ക് റിപ്പോര്ട്ട് ചെയ്യുന്നുണ്ടെന്ന് ഉറപ്പാക്കണമെന്നും ഇതിനായി സെക്രട്ടറിമാരുടെ യോഗം വിളിച്ച് ചുമതലപ്പെടുത്തണമെന്നും മന്ത്രിമാര്ക്ക് നിര്ദ്ദേശം നല്കിയിട്ടുണ്ട്. ഒഴിവുകള് റിപ്പോര്ട്ടു ചെയ്യുന്നതില് വീഴ്ച വരുത്തുന്ന വകുപ്പു മേധാവികള്ക്കും നിയമനാധികാരികള്ക്കും എതിരെ കര്ശന നടപടി സ്വീകരിക്കും.
സീനിയോറിറ്റി തര്ക്കം, പ്രൊമോഷന് യോഗ്യരായവരുടെ അഭാവം, കോടതി കേസുകള് എന്നിവ മൂലം റെഗുലര് പ്രൊമോഷനുകള് തടസ്സപ്പെട്ട് എന്ട്രി കേഡറില് ഒഴിവുകള് പി.എസ്.സിക്ക് റിപ്പോര്ട്ട് ചെയ്യാന് കഴിയാത്ത കേസുകള് കണ്ടെത്തി ചീഫ് സെക്രട്ടറി അദ്ധ്യക്ഷനായ സമിതിക്ക് റിപ്പോര്ട്ട് ചെയ്യാന് വകുപ്പദ്ധ്യക്ഷന്മാര്ക്ക് നിര്ദ്ദേശം നല്കുകയുണ്ടായി. ഇതിന്റെ അടിസ്ഥാനത്തില് സീനിയോറിറ്റി തര്ക്കം നിലനില്ക്കുന്ന കേസുകളില് റെഗുലര് പ്രൊമോഷന് സ്റ്റേ ചെയ്തുകൊണ്ട് കോടതി/ട്രിബ്യൂണലില് നിന്നും ഇടക്കാല ഉത്തരവുകള് നല്കിയിട്ടുള്ള കേസുകളില് താത്കാലിക പ്രൊമോഷന് നടത്തി അതിന്റെ ഫലമായി വരുന്ന ഒഴിവുകള് പി.എസ്.സിക്ക് റിപ്പോര്ട്ട് ചെയ്യാന് നിര്ദ്ദേശം നല്കിയിട്ടുണ്ട്. ഒരു തസ്തികയില് പ്രൊമോഷന് അനുവദിക്കുന്നതിന് ഒഴിവുകള് നിലനില്ക്കുകയും എന്നാല് പ്രൊമോഷന് നല്കുന്നതിന് അര്ഹത/ യോഗ്യതയുള്ളവരുടെ അഭാവം നിലനില്ക്കുകയും ചെയ്യുന്ന സാഹചര്യത്തില് പ്രസ്തുത തസ്തികകള് എന്ട്രി കേഡറിലേക്ക് താത്കാലികമായി തരം താഴ്ത്തി, ആ ഒഴിവുകളും പി.എസ്.സി.ക്ക് റിപ്പോര്ട്ട് ചെയ്യാനും നിര്ദ്ദേശം നല്കിയിട്ടുണ്ട്.
നിലവിലുള്ള ഒഴിവുകള് റിപ്പോര്ട്ട് ചെയ്യാതിരിക്കുകയും റാങ്ക് ലിസ്റ്റുകളുടെ കാലാവധി നീട്ടി നല്കുകയും ചെയ്യുക എന്നുള്ളത് സര്ക്കാരിന്റെ നയമല്ല. റാങ്ക് ലിസ്റ്റുകളില് നിന്നും മുഴുവന് ഒഴിവുകളിലും നിയമനം നടത്താന് നടപടികള് സ്വീകരിച്ചിട്ടുള്ളതിനാല് അവയുടെ കാലാവധി നീട്ടേണ്ട സാഹചര്യം നിലവിലില്ല എന്നും മുഖ്യമന്ത്രി വ്യക്തമാക്കി.