പള്ളിത്തര്ക്കത്തില് സുപ്രീംകോടതി വിധിക്കെതിരെ നിയമനിര്മാണം നടത്താനുള്ള സര്ക്കാര് നീക്കത്തിനെതിരെ നിലപാട് കടുപ്പിച്ച് ഓര്ത്തഡോക്സ് സഭ. സര്ക്കാരിനെതിരെ സഭ പ്രതിഷേധ പ്രമേയം പുറത്തിറക്കി. സഭയുടെ അവകാശത്തിനും സ്വാതന്ത്ര്യത്തിനും മേലുള്ള കടന്നുകയറ്റമാണ് സര്ക്കാര് നിയമനിര്മാണത്തിലൂടെ ലക്ഷ്യമിടുന്നതെന്ന് ഓര്ത്തഡോക്സ് സഭ വ്യക്തമാക്കി.
സമാധാന അന്തരീക്ഷം ഇല്ലാതാക്കാനാണ് ശ്രമിക്കുന്നത്. സര്ക്കാര് നീക്കത്തിന് പിന്നില് ഗൂഢ ഉദ്ദേശമുണ്ടെന്നും പ്രമേയത്തില് ചൂണ്ടിക്കാട്ടുന്നു.
നിയമനിര്മാണത്തിനെതിരെ ഓര്ത്തഡോക്സ് സഭ ഇന്ന് പ്രതിഷേധദിനം ആചരിക്കുകയാണ്. ഇതിന്റെ ഭാഗമായാണ് ഓര്ത്തഡോക്സ് സഭയുടെ കീഴിലെ പള്ളികളില് പ്രതിഷേധ പ്രമേയം വായിച്ച് പാസാക്കി. പ്രതിഷേധത്തിന്റെ തുടര്ച്ചയായി നാളെ രാവിലെ മുതല് പാളയം സെന്റ് ജോര്ജ് ഓര്ത്തഡോക്സ് കത്തീഡ്രല് പള്ളിയില് മെത്രാപ്പോലീത്തമാരും വൈദികരും ഉപവാസ പ്രാര്ഥന യജ്ഞം നടത്തുമെന്നും ഓര്ത്തഡോക്സ് സഭ അറിയിച്ചു.