ആമയിഴഞ്ചാന് തോടിന്റെ റെയില്വേ സ്റ്റേഷനടിയില് കൂടി പോകുന്ന ഭാഗത്ത് മാലിന്യം കുന്നുകൂടി കിടക്കുന്നത് മൂലമുള്ള വിവിധ പ്രശ്നങ്ങളില് സ്വീകരിക്കേണ്ട നടപടികള് ചര്ച്ചചെയ്യാന് മുഖ്യമന്ത്രി പിണറായി വിജയന് അടിയന്തര യോഗം വിളിച്ചു.
നാളെ രാവിലെ 11:30ന് ഓണ്ലൈനായാണ് യോഗം ചേരുക. തദ്ദേശ സ്വയംഭരണം, പൊതുമരാമത്ത്, തൊഴില്, ഭക്ഷ്യം, കായികം-റെയില്വേ, ആരോഗ്യം, ജലവിഭവം വകുപ്പ് മന്ത്രിമാരും ബന്ധപ്പെട്ട എംഎല്എമാരും തിരുവനന്തപുരം മേയറും പങ്കെടുക്കും. ചീഫ് സെക്രട്ടറി ഉള്പ്പെടെയുള്ള ഉന്നത ഉദ്യോഗസ്ഥരും റെയില്വേ ഡിവിഷണല് മാനേജരും യോഗത്തിലുണ്ടാകും.
ഈ പ്രദേശത്ത് മാലിന്യം കുന്നു കൂടുന്നത് വെള്ളത്തിന്റെ ഒഴുക്ക് തടസപ്പെടുന്നതിനും തമ്പാനൂരിലും പരിസരത്തും വെള്ളക്കെട്ടുണ്ടാകുന്നതിനും ഇടയാക്കുന്നുണ്ട്. രോഗാണുക്കള് പെരുകി ഗുരുതരമായ ആരോഗ്യ പ്രശ്നങ്ങള്ക്കും കാരണമാവുന്ന സാഹചര്യത്തിലാണ് യോഗം.