ലൈംഗിക പീഡന കേസില് ബിനോയ് കോടിയേരിയുടെ മുന്കൂര് ജാമ്യാപേക്ഷയില് വിധി തിങ്കളാഴ്ച. ദിന്ദോഷി സെഷന്സ് കോടതിയാണ് മുന്കൂര് ജാമ്യാപേക്ഷ പരിഗണിച്ചത്. മുന്കൂര് ജാമ്യം ലഭിക്കാത്ത സാഹചര്യത്തില് ബിനോയിയെ തിങ്കളാഴ്ച വരെ അറസ്റ്റ് ചെയ്യരുതെന്നും കോടതി നിര്ദേശം. ഉച്ചയ്ക്ക് മൂന്ന് മണിക്കാണ് കോടതിയില് ജാമ്യാപേക്ഷയില് വാദം തുടങ്ങിയത്. കോടതിയില് യുവതി ഹാജരാക്കിയ രേഖകള് പരിശോധിക്കുന്നതിന് കൂടുതല് സമയം വേണമെന്നതിനാലാണ് വിധി പറയുന്നത് മാറ്റിവെച്ചത്. അതേസമയം യുവതിക്ക് അഭിഭാഷകനെ നല്കണമെന്നും കോടതി നിര്ദേശിച്ചു.
യുവതിയുടെ മൊഴിയിലെ വൈരുദ്ധ്യങ്ങള് ചൂണ്ടിക്കാട്ടിയാണ് ബിനോയിയുടെ അഭിഭാഷകന് കോടതിയില് വാദിച്ചത്. യുവതി ബിനോയിക്ക് അയച്ച വക്കീല് നോട്ടീസില് പറയുന്നത് അഞ്ച് കോടി രൂപ വേണമെന്നായിരുന്നു. മാത്രവുമല്ല വിവാഹം കഴിച്ചുവെന്നും അതിനുള്ള രേഖകളും ഹാജരാക്കിയിട്ടുണ്ട്. എന്നാല് രണ്ടാമത് പൊലീസിന് നല്കിയ പരാതിയിലുള്ളത് വിവാഹ വാഗ്ദാനം നല്കി പീഡിപ്പിച്ചുവെന്നാണ്. ഇതിലെ വൈരുദ്ധ്യങ്ങളാണ് അഭിഭാഷകന് എടുത്തു പറഞ്ഞത്. വിവാഹം കഴിച്ചുവെങ്കില് ബലാത്സംഗ കുറ്റം നിലനില്ക്കില്ല എന്നായിരുന്നു ജാമ്യാപേക്ഷയിലെ പ്രധാന വാദം.
എന്നാല് പ്രോസിക്യൂഷന് ബിനോയ് കോടിയേരിയെ പിടികൂടാന് സാധിച്ചില്ലെന്നും രാഷ്ട്രീയ നേതാവിന്റെ മകനാണെന്നും കോടതിയില് വാദിച്ചു. കുട്ടിയുടെ പിതൃത്വം തെളിയിക്കാന് ഡി.എന്.എ പരിശോധന നടത്തണമെന്നും അതിന് ബിനോയിയെ കസ്റ്റഡിയില് ആവശ്യമുണ്ടെന്നും പ്രോസിക്യൂഷന് കോടതിയില് വാദിച്ചു. കഴിഞ്ഞ വെള്ളിയാഴ്ചയാണ് അപേക്ഷ സമര്പ്പിച്ചത്. തിങ്കളാഴ്ച വിധി പറയുമെന്ന് പറഞ്ഞിരുന്നെങ്കിലും ഇന്നത്തേക്ക് മാറ്റുകയായിരുന്നു. ജൂണ് 13-നാണ് ബിഹാര് സ്വദ്വേശിയായ യുവതി ഓഷിവാര പോലീസ് സ്റ്റേഷനില് ബിനോയിക്കെതിരേ ലൈംഗിക പീഡനം ആരോപിച്ച് പരാതി നല്കിയത്.