പെരുമ്പാവൂര് പ്ലൈവുഡ് കമ്പനിയിലെ തീച്ചൂളയില് വീണ ഇതര സംസ്ഥാന തൊഴിലാളിയുടെ മൃതദേഹം കണ്ടെത്തി. സുരക്ഷാ ജീവനക്കാരനായ ബംഗാള് സ്വദേശി നസീര് (23) ആണ് മരിച്ചത്. വ്യാഴാഴ്ച രാവിലെ ഏഴിന് ഓടക്കാലിയിലെ യൂനിവേഴ്സല് പ്ലൈവുഡ് കമ്പനിയിലായിരുന്നു അപകടം.
15 അടി ആഴമുള്ള ഗര്ത്തത്തില് കൂട്ടിയിട്ടിരുന്ന പ്ലൈവുഡ് അവശിഷ്ടങ്ങള്ക്ക് തീ പിടിച്ചിരുന്നു. മാലിന്യ കൂമ്പാരത്തില് നിന്നു പുക ഉയരുന്നു കണ്ട് ഇദ്ദേഹം പൈപ്പില് നിന്നു വെള്ളം ചീറ്റിച്ചു അണയ്ക്കാന് ശ്രമിക്കുന്നതിനിടെ താഴേക്കു വീഴുകയായിരുന്നു.
സംഭവം കണ്ട മറ്റൊരു അതിഥിത്തൊഴിലാളി ഹോസ് ഇട്ടു കൊടുത്തു രക്ഷപ്പെടുത്താന് ശ്രമിച്ചെങ്കിലും വിജയിച്ചില്ല. യന്ത്രം ഉപയോഗിച്ചു മാലിന്യം വശങ്ങളിലേക്ക് മാറ്റിയാണ് ഇന്നലെ തിരച്ചില് നടത്തിയത്.
തീ അണക്കാനും നസീര് ഹുസൈനെ കണ്ടെത്താനും രാത്രി വൈകിയും ശ്രമം നടത്തിയിരുന്നു. ഒരാഴ്ച മുമ്പാണ് നസീര് ഹുസൈന് പ്ലൈവുഡ് കമ്പനിയില് ജോലിക്കെത്തിയത്.