ബിബിസി ഡോക്യുമെന്ററി കേരളത്തില് യൂത്ത് കോണ്ഗ്രസ്സിന്റെ നേതൃത്വത്തില് പ്രദര്ശിപ്പിക്കുമെന്ന് യൂത്ത്കോണ്ഗ്രസ് ഉപാദ്ധ്യക്ഷന് കെ.എസ് ശബരിനാഥന്. ചരിത്ര യാഥാര്ത്ഥ്യങ്ങള് സംഘപരിവാറിനും മോദിക്കുമൊക്കെ എന്നും ശത്രുപക്ഷത്താണെന്നും ഒറ്റു കൊടുത്തതിന്റെയും മാപ്പ് എഴുതിയതിന്റെയും വംശഹത്യ നടത്തിയതിന്റെയുമൊക്കെ ഓര്മ്മപ്പെടുത്തലുകള് അധികാരം ഉപയോഗിച്ച് മറച്ച് പിടിക്കാവുന്നതല്ലെന്നും ശബരീനാഥന് ഫെയ്സ്ബുക്കില് കുറിച്ചു.
ഡോക്യുമെന്ററി സംസ്ഥാന വ്യാപകമായി പ്രദര്ശിപ്പിക്കുമെന്ന് കെപിസിസി മൈനോറിറ്റി ഡിപ്പാര്ട്ട്മെന്റ് ചെയര്മാന് അഡ്വ. ഷിഹാബുദ്ദീന് കാര്യയത്ത്. റിപ്പബ്ലിക് ദിനത്തില് സംസ്ഥാനത്തെ എല്ലാ ജില്ലാ ആസ്ഥാനങ്ങളിലും ഡോക്യുമെന്ററി പ്രദര്ശിപ്പിക്കും. ഡോക്യുമെന്ററിയ്ക്ക് രാജ്യത്ത് അപ്രഖ്യാപിത വിലക്ക് പ്രഖ്യാപിച്ച സാഹചര്യത്തിലാണ് തീരുമാനം. ഗുജറാത്ത് വംശഹത്യയില് മോദി – അമിത്ഷാ കൂട്ടുകെട്ടിന്റെ പങ്കാളിത്തം പുറത്തുവരാതിരിക്കാനാണ് ഡോക്യുമെന്ററി രാജ്യത്ത് വിലക്കിയിരിക്കുന്നതെന്ന് അഡ്വ. ഷിഹാബുദ്ദീന് കാര്യയത്ത് പറഞ്ഞു
ഡോക്യുമെന്റി കേരളത്തില് പ്രദര്ശിപ്പിക്കാനുള്ള നീക്കം തടയണമെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന് ആവശ്യപ്പെട്ടു. ഇത് ചൂണ്ടിക്കാട്ടി സുരേന്ദ്രന് മുഖ്യമന്ത്രി പിണറായി വിജയന് പരാതി നല്കി. ഇന്ത്യയുടെ ജനാധിപത്യത്തെയും പരമോന്നത നീതിപീഠത്തെയും അപമാനിക്കുന്ന വിവാദ ഡോക്യുമെന്ററി കേരളത്തില് പ്രദര്ശിപ്പിക്കാന് അനുമതി നല്കരുതെന്നാണ് പരാതിയിലെ ആവശ്യം.
ഇന്ത്യയുടെ ഐക്യവും അഖണ്ഡതയും അപകടപ്പെടുത്താനുള്ള വിദേശനീക്കങ്ങള്ക്ക് കൂട്ടുനില്ക്കുന്നതിന് തുല്യമാണ് പ്രദര്ശനം അനുവദിക്കുന്നത്.ഇക്കാര്യത്തില് മുഖ്യമന്ത്രിയുടെ അടിയന്തരമായ ഇടപെടല് ആവശ്യമാണ്. രണ്ടു ദശകം മുമ്പ് നടന്ന ദൗര്ഭാഗ്യകരമായ സംഭവങ്ങള് വീണ്ടും ഓര്മിപ്പിക്കുന്നത് മതസ്പര്ധ വളര്ത്താന് ലക്ഷ്യമിട്ടാണെന്നത് വ്യക്തമാണ്.
കേരളത്തിന്റെ സമാധാന അന്തരീക്ഷം തകര്ക്കുവാനായി ബോധംപൂര്വ്വം ചിലര് നടത്തുന്ന ഇത്തരം രാജ്യദ്രോഹ പ്രവര്ത്തനങ്ങള് മുളയിലേ നുള്ളേണ്ടതുണ്ടെന്നും കെ.സുരേന്ദ്രന് കത്തില് ആവശ്യപ്പെട്ടു.