മലപ്പുറം: സംസ്ഥാനത്ത് നിര്‍ണായക മത്സരം നടക്കുന്ന മണ്ഡലങ്ങളില്‍ നടത്തിയ വിശദ സര്‍വേകളുടെ ഫലങ്ങള്‍ പുറത്തു വന്നു. ന്യൂ ഏജ് റിസര്‍ച്ച്, സെന്റര്‍ ഫോര്‍ ഇലക്ഷന്‍ അനാലിസിസ് എന്നിവര്‍ നടത്തിയ സര്‍വേകള്‍ താനൂര്‍ ഇടതിനൊപ്പം തുടരുമെന്ന് പറയുന്നു.
ന്യൂ ഏജ് റിസര്‍ച്ച് 3000 ല്‍ അധികം സാമ്പിളുകള്‍ ശേഖരിച്ച് താനൂരില്‍ നടത്തിയ സര്‍വേയില്‍ ഇടതു സ്വതന്ത്രന്‍ വി അബ്ദുറഹ്മാന്റെ വിജയം സുനിശ്ചിതമെന്ന് പ്രവചിക്കുന്നു.
നിറമരുതൂര്‍, താനാളൂര്‍, ഒഴൂര്‍ പഞ്ചായത്തുകളില്‍ വ്യക്തമായ മുന്‍തൂക്കം ഇടതിനുണ്ട്. താനൂര്‍ നഗരസഭയില്‍ ലീഗിന്റെ വലിയ മുന്‍കൈ പിടിച്ച് കെട്ടാനും വി അബ്ദുറഹ്മാന് കഴിയും. ചെറിയമുണ്ടം, പൊന്‍മുണ്ടം എന്നിവിടങ്ങളില്‍ ഇഞ്ചോടിഞ്ച് പോരാട്ടമാണ്.വോട്ടര്‍മാരുടെ പ്രധാന മുന്‍ഗണന മണ്ഡലത്തിന്റെ വളര്‍ച്ചയും, മാറ്റവുമാണ്.
സ്ത്രീകള്‍ പരമ്പരാഗത രാഷ്ട്രിയവും, കുടുംബത്തിന്റെ വോട്ടിങ്ങ് പാറ്റേണും വിട്ട് വോട്ട് ചെയ്യും എന്നതാണ് സര്‍വേയുടെ പ്രധാന കണ്ടെത്തല്‍. നിഷ്പക്ഷ വോട്ടുകളും വി അബ്ദുറഹ്മാന് ഏകീകരിക്കും.
പികെ ഫിറോസ് ശക്തമായ മത്സരമാണ് കാഴ്ച്ചവെക്കുന്നത്. ലീഗ് അണികളെ ഉണര്‍ത്താനും അദ്ദേഹത്തിന് കഴിഞ്ഞിട്ടുണ്ട്. പക്ഷെ നിര്‍ണായകമായ നിഷ്പക്ഷ, രാഷ്ട്രിയേതര വോട്ടുകളെ സ്വന്തമാക്കാന്‍ അദ്ദേഹത്തിനാകില്ലെന്നാണ് സൂചന. ചെറുപ്പക്കാരുടെ പിന്തുണയില്‍ ഇരുവരും ഒപ്പത്തിനൊപ്പമാണ്.
ഒരു മണ്ഡലത്തില്‍ ഏറ്റവും കൂടുതല്‍ സാമ്പിളുകള്‍ പരിശോധിച്ച സര്‍വേ ആണ് ന്യൂഏജ് നടത്തിയത്. സെന്റര്‍ ഫോര്‍ ഇലക്ഷന്‍ അനാലിസിസ് നടത്തിയ സര്‍വേയും താനൂരില്‍ ഭൂരിപക്ഷം ഉയരുമെന്ന് പ്രവചിക്കുന്നു. , 2000 സാമ്പിളുകള്‍ ആണ് പരിശോധിച്ചത്. രാഷ്ട്രിയേതര വോട്ടുകള്‍ ഗണ്യമായി ആകര്‍ഷിക്കാന്‍ വി അബ്ദുറഹ്മാന് കഴിയുന്നതായി സര്‍വേ പറയുന്നു.
ഇവിടെ വികസനം വോട്ടായി മാറും. പി കെ ഫിറോസിനും നല്ല പ്രതിഛായ ഉണ്ട്. പക്ഷെ താനൂരിന്റെ പ്രാദേശിക വികാരം വി അബ്ദുറഹ്മാനെ തുണയ്ക്കുന്നതായി സര്‍വേ ചൂണ്ടിക്കാട്ടുന്നു.
മണ്ഡലത്തില്‍ സംസ്ഥാന സര്‍ക്കാരിനും, മുഖ്യമന്ത്രിക്കും മികച്ച പ്രതിഛായ ആണുള്ളത്. അതും വിജയത്തെ സ്വാധീനിക്കുന്നു