സംഗീതജ്ഞന് ബാലഭാസ്കറിന്റെ മരണത്തില് അന്വേഷണ റിപ്പോര്ട്ട് രണ്ടു ദിവസത്തിനകം നല്കണമെന്ന് ഹൈക്കോടതി. ക്രൈംബ്രാഞ്ചിനോടാണ് അന്വേഷണവുമായി ബന്ധപ്പെട്ട വിവരങ്ങള് രണ്ട് ദിവസത്തിനകം നല്കണമെന്ന് ഹൈക്കോടതി നിര്ദേശിച്ചത്. സ്വര്ണക്കടത്ത് കേസ് പ്രതികളായ വിഷ്ണു, പ്രകാശ് തമ്പി എന്നിവരുടെ ജാമ്യാപേക്ഷ പരിഗണിക്കവെയാണ് ഹൈക്കോടതിയുടെ നിര്ദേശം.
സ്വര്ണക്കടത്ത് കേസിലെ പ്രതികള്ക്ക് ബാലഭാസ്കറിന്റെ മരണത്തില് ബന്ധമെന്തെന്ന കാര്യത്തിലാണ് ഹൈക്കോടതി റിപ്പോര്ട്ട് തേടിയിരിക്കുന്നത്. മരണത്തില് ദുരൂഹതയുണ്ടോ, അങ്ങനെയെങ്കില് എന്തെല്ലാം കാര്യങ്ങളിലാണ് സംശയമുണ്ടായിരിക്കുന്നത്, സ്വര്ണക്കടത്തുമായി ഇതിനുള്ള ബന്ധമെന്ത്, അന്വേഷണം ഇപ്പോള് ഏത് നിലയിലാണ് എന്നീ കാര്യങ്ങളാണ് രണ്ട് ദിവസത്തിനകം ക്രൈംബ്രാഞ്ച് ഹൈക്കോടതിയെ അറിയിക്കേണ്ടത്.
ബാലഭാസ്കറിന്റെ മരണം നടന്ന് മാസങ്ങള്ക്ക് ശേഷമാണ് സംഗീതജ്ഞനുമായി അടുത്ത ബന്ധം പുലര്ത്തിയിരുന്ന പ്രകാശ് തമ്പി, വിഷ്ണു എന്നിവര് തിരുവനന്തപുരം വിമാനത്താവളം വഴിയുള്ള സ്വര്ണക്കടത്ത് കേസുമായി ബന്ധപ്പെട്ട് അറസ്റ്റ് ചെയ്യപ്പെടുന്നത്.
പ്രകാശന് തമ്പിക്കു പിന്നാലെ കീഴടങ്ങിയ വിഷ്ണുവിനെയും ചോദ്യം ചെയ്തതോടെയാണ് നിര്ണായക വിവരങ്ങള് ലഭിച്ചത്. നവംബര് മുതല് മേയ് വരെയുള്ള ഏഴു മാസങ്ങളിലായി പ്രകാശന് തമ്പി ഏഴു തവണയും വിഷ്ണു 10 തവണയും ദുബായിലേക്കു യാത്ര ചെയ്തു. സ്വര്ണക്കടത്തിലെ കാരിയറായി കണ്ടെത്തിയിട്ടുള്ളവരും ഇതേദിവസങ്ങളില് യാത്ര ചെയ്തിട്ടുണ്ട്.അതിനാല് ഈ യാത്രകള് സ്വര്ണക്കടത്തിനായിരുന്നുവെന്നാണ് അന്വേഷണസംഘത്തിന്റെ നിഗമനം. ഇത്രയും യാത്രകളിലായി പ്രകാശന് തമ്പി 60 കിലോയും വിഷ്ണു 150 കിലോയും സ്വര്ണം കടത്തിയെന്നാണു സൂചന.
ബാലഭാസ്കറിന്റെ മരണത്തിനു ശേഷമാണ് സ്വര്ണക്കടത്ത് നടന്നത്. അതിനു മുമ്പ് വളരെ കുറച്ച് തവണ മാത്രമേ ഇരുവരും ദുബായിലേക്കു പോയിട്ടുള്ളു. അതുകൊണ്ട് ബാലഭാസ്കര് ജീവിച്ചിരിക്കെ സ്വര്ണക്കടത്തുള്ളതായി കരുതുന്നില്ല.സ്വര്ണക്കടത്തിന് അറസ്റ്റിലായ കസ്റ്റംസ് സൂപ്രണ്ടിന്റെ മൊഴിയും ഇതു ശരിവെയ്ക്കുന്നു. ബാലഭാസ്കറിന്റെ മരണശേഷമാണ് ആ പേരു പറഞ്ഞ് പ്രകാശന് തമ്പി പരിചയപ്പെട്ടതെന്നാണ് സൂപ്രണ്ട് രാധാകൃഷ്ണന്റെ മൊഴി. അതേസമയം, കാരിയര് എന്നതിനപ്പുറം അഡ്വ. ബിജുവിനൊപ്പം സ്വര്ണക്കടത്ത് നിയന്ത്രിക്കുന്നയാളാണു വിഷ്ണു. ദുബായിലെത്തുന്ന കാരിയര്മാര്ക്കു സ്വര്ണം എത്തിച്ച് നല്കുന്നതും സൗകര്യങ്ങള് ഏര്പ്പാടാക്കുന്നതും വിഷ്ണുവിന്റെ ജോലിക്കാരാണെന്നുമാണ് ഡിആര്ഐയുടെ കണ്ടെത്തല്.
അപകടവുമായി ബന്ധപ്പെട്ട് കൂടുതല് സാക്ഷികളെ ചോദ്യം ചെയ്യുകയും അപകടം പുനരാവിഷ്കരിക്കുകയും ചെയ്തു. അര്ജുന് ഉള്പ്പടെ പ്രധാനപ്പെട്ട പലരും ഒളിവില് പോയി എന്ന വിവരം വന്നതിനെത്തുടര്ന്ന് സംഭവത്തിലെ ദുരൂഹതയേറി.
ബാലഭാസ്കറിന്റെ സാമ്പത്തിക ഇടപാടുകളെക്കുറിച്ച് ആദായനികുതി വകുപ്പിനും ബാങ്കുകള്ക്കും ക്രൈം ബ്രാഞ്ച് നോട്ടീസ് നല്കിയിട്ടുണ്ട്. ഇതും പരിശോധിച്ച് വരവെയാണ് ഹൈക്കോടതി അന്വേഷണത്തെക്കുറിച്ച് റിപ്പോര്ട്ട് തേടുന്നത്.