സ്വന്തം ചരമവാര്‍ത്ത പത്രങ്ങളില്‍ പരസ്യംനല്‍കിയ വൃദ്ധനെ കാണാനില്ല. കണ്ണൂര്‍ കുറ്റിക്കോല്‍ സ്വദേശിയായ ജോസഫിനെയാണ് രണ്ടു ദിവസം മുമ്പ് കാണാതായത്. രോഗബാധിതനായ ജോസഫ് തിരുവനന്തപുരത്ത് ആര്‍സിസിയില്‍ ചികിത്സയ്ക്ക് പോകുന്നുവെന്ന കാരണത്താല്‍ നാല് ദിവസം മുമ്പാണ് വീടു വിട്ടത്. എന്നാല്‍ കഴിഞ്ഞ ദിവസത്തെ പത്രങ്ങളില്‍ തളിപ്പറമ്പിലെ ജോസഫ് മേലുക്കുന്നേലിന്റെ ചരമവാര്‍ത്ത കണ്ട നാട്ടുകാര്‍ നടത്തിയ അന്വേഷത്തിലാണ് ജോസഫിനെ കാണാനില്ലെന്ന് മനസ്സിലായത്.
ചാര്‍ളി എന്ന സിനിമയിലെ പ്രധാന കഥാപാത്രമായ ദുല്‍ഖര്‍ സല്‍മാന്‍ ഇതു പോലെ ചരമ പരസ്യം നല്‍കി മുങ്ങുന്നുണ്ട്. സിനിമയെ അനുസ്മരിപ്പിക്കും വിധമാണ് ജോസഫിന്റെയും പ്രവൃത്തിയെന്ന് നാട്ടുകാര്‍ പറയുന്നു.
എന്നാല്‍ പൊലിസ് നടത്തിയ അന്വേഷണത്തില്‍ ഇയാള്‍ പയ്യന്നൂരിലെ ഒരു ലോഡ്ജില്‍ താമസിക്കുകയായിരുന്നെന്ന് വ്യക്തമായിട്ടുണ്ട്. പത്രമോഫീസില്‍ ജോസഫ് തന്നെയാണ് ചരമവാര്‍ത്തയും ലഘു ജീവചരിത്രവും എത്തിച്ചതും. പഴയ ഫോട്ടോ നല്‍കിയതിനാല്‍ പെട്ടെന്ന് തിരിച്ചറിയാനുമായില്ല. വാര്‍ത്ത കണ്ട് ഞെട്ടിയ ലോഡ്ജ് ജീവനക്കാരനും അന്വേഷണം നടത്തിയെങ്കിലും കണ്ടെത്താനായി. തന്റെ ജീവിതത്തെക്കുറിച്ചും സംസ്‌ക്കാര ചടങ്ങുകളെക്കുറിച്ചും ബന്ധുക്കളെക്കുറിച്ചുമെല്ലാം വിശദവിവരങ്ങള്‍ നല്‍കിയാണ് പരസ്യം ചെയ്തിരിക്കുന്നത്. ഭാര്യ നല്‍കിയ പരാതിയില്‍ പൊലീസ് അന്വേഷണം നടത്തി വരികയാണ്.