അന്തരിച്ച മുൻ മുഖ്യമന്ത്രിയും മുതിർന്ന സിപിഎം നേതാവുമായ വി എസ് അച്യുതാനന്ദന്റെ വേർപാടിൽ അനുശോചനം രേഖപ്പെടുത്തി പ്രതിപക്ഷ നേതാവ് വി ഡി സതീശൻ. രണ്ടക്ഷരം കൊണ്ട് കേരള രാഷ്ട്രീയത്തില് സ്വന്തം സ്ഥാനം കൃത്യമായി അടയാളപ്പെടുത്തിയ നേതാവാണ് വി എസ് എന്ന് പറഞ്ഞ വി ഡി സതീശൻ കല്ലും മുള്ളും നിറഞ്ഞ വഴികളിലൂടെ രാഷ്ട്രീയ പ്രവര്ത്തനം നടത്തി വി എസ് അച്യുതാനന്ദൻ പ്രതിപക്ഷ നേതാവും മുഖ്യമന്ത്രിയുമായെന്നും കൂട്ടിച്ചേർത്തു.
പ്രതിപക്ഷ നേതാവായിരുന്നപ്പോഴും മുഖ്യമന്ത്രിയായിരുന്നപ്പോഴും കടിഞ്ഞാണുകളൊക്കെ പൊട്ടിച്ച് പ്രതിപക്ഷമായി തന്നെയാണ് വി.എസ് നിലയുറപ്പിച്ചതെന്നും വി ഡി സതീശൻ പറഞ്ഞു. അത് വി എസ് ആസ്വദിച്ചുവെന്ന് തോന്നിയിട്ടുണ്ടെന്നും വി ഡി സതീശൻ പറഞ്ഞു. പ്രതിപക്ഷ രാഷ്ട്രീയ പ്രവര്ത്തനത്തിന് മറ്റൊരു മുഖം നല്കിയ നേതാവായിരുന്നു വി എസ് അച്യുതാനന്ദൻ. പ്രകൃതി സംരക്ഷണവുമായി ബന്ധപ്പെട്ട സമരങ്ങളുടെ മുന്നിരയില് നില്ക്കുകയും പിന്തുണയ്ക്കുകയും ചെയ്തു.
കൊക്കകോളയ്ക്ക് എതിരായ സമരം ഉള്പ്പെടെ കേരളത്തിന്റെ വിവിധ ഭാഗങ്ങളില് പ്രകൃതി സംരക്ഷണത്തിനു വേണ്ടിയും ജലചൂഷണത്തിന് എതിരെയും നടത്തിയ സമരങ്ങളിലും വി.എസ് ഭാഗഭാക്കായി എന്നും വി ഡി സതീശൻ പറഞ്ഞു. നിയമസഭയ്ക്കത്തും പുറത്തും മൂര്ച്ചയേറിയ നാവായിരുന്നു വി.എസിന്. എതിരാളികള്ക്കും പുറമെ സ്വന്തം പാര്ട്ടി നേതാക്കളും ആ നാവിന്റെ ചൂടറിഞ്ഞു. പൊതുസമൂഹത്തിന്റെ പിന്തുണ വലിയ തോതില് നേടിയതിന് ശേഷമാണ് അദ്ദേഹം കേരളത്തിന്റെ മുഖ്യമന്ത്രിയായത്. മുഖ്യമന്ത്രിയെന്ന നിലയില് വി.എസിന് പരിമിതികളുണ്ടായിരുന്നു. പക്ഷെ ആ പരിമിതിയെ വി.എസ് പരിഗണിച്ചതേയി എന്നും വി ഡി സതീശൻ കൂട്ടിച്ചേർത്തു.