പുതിയ രാഷ്ട്രീയ പാർട്ടി പ്രഖ്യാപിച്ചതിന് പിന്നാലെ താൻ അഭിനയ ജീവിതം നിർത്തുകയാണ് എന്ന വിജയ്യുടെ തീരുമാനം തെന്നിന്ത്യൻ സിനിമയിൽ തന്നെ വലിയ ചർച്ചകൾക്ക് വഴിതെളിയിച്ചിരുന്നു. അതുകൊണ്ട് തന്നെ ‘ദളപതി 69’ എന്ന സിനിമ വിജയ്യുടെ അവസാന ചിത്രമായിരിക്കുമെന്നും ഏകദേശം ഉറപ്പായിരിക്കുകയാണ്. ഇപ്പോഴിതാ ചിത്രത്തിനെ കുറിച്ചുള്ള നിരാശാജനകമായ ഒരു റിപ്പോർട്ടാണ് പ്രചരിക്കുന്നത്.
ഡിവിവി എന്റര്ടെയ്ൻമെന്റ്സിന്റെ ബാനറിലായിരിക്കും ദളപതി 69 നിർമിക്കുക എന്നായിരുന്നു റിപോർട്ടുകൾ. ആർആർആർ എന്ന വമ്പൻ ഹിറ്റ് സിനിമയുടെ നിർമാതാക്കളാണ് ഡിവിവി എന്റര്ടെയ്ൻമെന്റ്സ്. എന്നാൽ ഇപ്പോൾ സിനിമയിൽ നിന്ന് പ്രശസ്ത നിർമ്മാതാവ് ഡി.വി.വി ദനയ്യയുടെ ഡിവിവി എന്റര്ടെയ്ൻമെന്റ്സ് പിന്മാറിയെന്ന പുതിയ റിപ്പോർട്ടുകൾ ആണ് ഓൺലൈനിൽ പ്രചരിക്കുന്നത്.
ഇതിന് പിന്നിലെ കാരണം ഇവർ വെളിപ്പെടുത്തിയിട്ടില്ല. വരാനിരിക്കുന്ന ചിത്രങ്ങൾ നിർമ്മിക്കാൻ ടീം മറ്റ് പ്രശസ്ത പ്രൊഡക്ഷനുകളുമായി ഇപ്പോൾ ചർച്ച നടത്തി വരികയാണ്. റിപ്പോർട്ടുകൾ പ്രകാരം, 7 സ്ക്രീൻ സ്റ്റുഡിയോ, സൺ പിക്ചേഴ്സ്, എജിഎസ് എൻ്റർടൈൻമെൻ്റ് എന്നിവരാണ് പ്രോജക്റ്റിൻ്റെ നിർമ്മാതാക്കളായി എത്താൻ സാധ്യതയുള്ളവർ.
എജിഎസ് എൻ്റർടെയ്ൻമെൻ്റ് ഒഴികെയുള്ള എല്ലാ പ്രൊഡക്ഷൻ ഹൗസുകളും വിജയ്ക്കൊപ്പം മുമ്പ് പ്രവർത്തിച്ചിട്ടുണ്ട്. അതേസമയം, താഴെപ്പറയുന്ന കാര്യങ്ങളിൽ നിർമ്മാതാക്കളോ അഭിനേതാക്കളോ ഔദ്യോഗിക സ്ഥിരീകരണങ്ങളൊന്നും നടത്തിയിട്ടില്ല.
ചിത്രത്തിന് വേണ്ടി വിജയ് കൈപ്പറ്റുന്നത് വമ്പൻ പ്രതിഫലമാണ് എന്ന റിപോർട്ടുകൾ പുറത്തു വന്നിരുന്നു. 250 കോടി രൂപയാണ് ചിത്രത്തിൽ വിജയ്ക്ക് പ്രതിഫലമെന്നാണ് പറയുന്നത്. തെലുങ്കിലെ പ്രമുഖ നിർമ്മാണ കമ്പനിയുടെ ബാനറിൽ ഒരുങ്ങുന്ന ചിത്രം സംവിധാനം ചെയ്യുന്നത് എച്ച്. വിനോദ് ആയിരിക്കുമെന്നും റിപ്പോർട്ടുകളുണ്ട്. ഇന്ത്യൻ സിനിമയിലെ തന്നെ ഒരു താരത്തിന്റെ ഏറ്റവും ഉയർന്ന പ്രതിഫലം കൂടിയാണ് ഇത്.
അതേസമയം വെങ്കട് പ്രഭു സംവിധാനം ചെയ്യുന്ന ‘ദി ഗ്രേറ്റസ്റ്റ് ഓഫ് ഓള് ടൈം’ എന്ന ചിത്രത്തിലാണ് ഇപ്പോൾ വിജയ് അഭിനയിച്ചുകൊണ്ടിരിക്കുന്നത്. പ്രശാന്ത്, പ്രഭു ദേവ, സ്നേഹ, ലൈല, ജയറാം, മീനാക്ഷി ചൗധരി, മോഹൻ, അജ്മൽ അമീർ, യോഗി ബാബു, വിടിവ ഗണേഷ്, തുടങ്ങി വൻതാരനിരയാണ് ചിത്രത്തിൽ അണിനിരക്കുന്നത്. എ. ജി. എസ് എന്റർടൈൻമെന്റാണ് ചിത്രം നിർമ്മിക്കുന്നത്. ലിയോക്ക് ശേഷം എത്തുന്ന വിജയ് ചിത്രമെന്ന പ്രത്യേകതയും ദളപതി 68 നുണ്ട്.
യുവൻ ശങ്കർ രാജയാണ് ചിത്രത്തിന് സംഗീതമൊരുക്കുന്നത്. സയൻസ് ഫിക്ഷൻ ഴോണറിലുള്ള ചിത്രത്തിന് വേണ്ടി വിര്ച്വൽ പ്രൊഡക്ഷന്റെ ഭാഗയമായുള്ള സെറ്റ് വർക്കുകളുടെ ചിത്രങ്ങള് വെങ്കട് പ്രഭു പങ്കുവെച്ചതും ഇതിനുവേണ്ടി വിജയ്യും സംവിധായകനും അമേരിക്ക സന്ദർശിച്ചതും വാർത്തകളിലിടം നേടിയിരുന്നു.