ഈ വര്‍ഷം തന്റെ ജന്മദിനം ആഘോഷമാക്കി മാറ്റരുതെന്ന് ആരാധകരോട് അഭ്യര്‍ത്ഥിച്ച് മാതൃകയായി ദളപതി വിജയ്. കോവിഡ് പ്രതിസന്ധികള്‍ തുടരവെയാണ് വിജയ് ആരാധകരോട് ആഘോഷം ഒഴിവാക്കാന്‍ ആവശ്യപ്പെട്ടിരിക്കുന്നത്. ജൂണ്‍ 22-ന് നാല്‍പത്തിയഞ്ചാം ജന്മദിനമാണ് വിജയ് ആഘോഷിക്കുന്നത്.
പ്രിയതാരത്തിന്റെ ജന്മദിനം വന്‍ ആഘോഷമാക്കി മാറ്റാറുണ്ട് ദളപതി ആരാധകര്‍. സാമൂഹിക, ജീവകാരുണ്യ പ്രവര്‍ത്തനങ്ങളും, ജനപ്രിയ സിനിമകളുടെ റീ-റിലീസുമാണ് ആഘോഷങ്ങളില്‍ പ്രധാനപ്പെട്ടത്. നിലവിലെ അവസ്ഥയില്‍ ആഘോഷം ഒഴിവാക്കി ജീവകാരുണ്യ പ്രവര്‍ത്തനങ്ങള്‍ തുടരാനാണ് വിജയ് അഭ്യര്‍ത്ഥിച്ചിരിക്കുന്നത്.
അതേസമയം, പുതിയ ചിത്രം മാസ്റ്ററിന്റെ ട്രെയ്‌ലര്‍ വിജയ്‌യുടെ ജന്മദിനത്തില്‍ എത്തുമെന്ന അഭ്യൂഹങ്ങളുമുണ്ട്. കൂടാതെ എ.ആര്‍ മുരുകദോസ് ഒരുക്കുന്ന അടുത്ത ചിത്രത്തിന്റെ ടൈറ്റിലും മറ്റു വിവരങ്ങളും എത്തുമെന്നും റിപ്പോര്‍ട്ടുകളുണ്ട്.