പാര്വതി തിരുവോത്തിനെ നായികയാക്കി സിദ്ധാര്ത്ഥ് ശിവ സംവിധാനം ചെയ്യുന്ന “വര്ത്തമാനം” ചിത്രത്തിലെ ആദ്യ ഗാനം പുറത്ത്. മലയാളത്തിലെ പ്രിയ നായികമാരായ മഞ്ജു വാര്യര്, റിമ കല്ലിങ്കല്, രമ്യ നമ്പീശന്, നവ്യ നായര് എന്നിവരുടെ ഫെയ്സ്ബുക്ക് പേജികളിലൂടെയാണ് ഗാനം റിലീസ് ചെയ്തിരിക്കുന്നത്.
സിന്ദഗി എന്ന ഗാനം വിശാല് ജോണ്സണ് രചിച്ച് ഹേഷം അബ്ദുള് വഹാബ് ആണ് ഈണമിട്ട് ആലപിച്ചിരിക്കുന്നത്. ഡല്ഹിയിലെ ഒരു യൂണിവേഴ്സിറ്റിയില് സ്വാതന്ത്ര്യ സമരസേനാനി മുഹമ്മദ് അബ്ദുള് റഹമാനെ കുറിച്ച് ഗവേഷണം നടത്തുവാനായി എത്തിയ ഫൈസാ സൂഫിയ എന്ന ഗവേഷക വിദ്യാര്ത്ഥിനി നേരിടുന്ന വെല്ലുവിളികളും പ്രതിസന്ധികളുമാണ് ചിത്രത്തിന്റെ പ്രമേയം.
സാമൂഹിക രാഷ്ട്രീയ പ്രശ്നങ്ങളെ ചിത്രം സജീവമായി ചര്ച്ച ചെയ്യുമ്പോള് തന്നെ ഒരു കൊമേഴ്ഷ്യല് ഫിലിമിന്റെ എല്ലാ ചേരുവകളും അടങ്ങിയതാണ് വര്ത്തമാനം എന്നാണ് സംവിധായകന് സിദ്ധാര്ത്ഥ് ശിവ പറയുന്നത്. റോഷന് മാത്യു, സിദ്ദിഖ് എന്നിവരും ചിത്രത്തില് പ്രധാന കഥാപാത്രങ്ങളായി എത്തുന്നു. ബെന്സി പ്രൊഡക്ഷന്സിന്റെ ബാനറില് ബെന്സി നാസറും ആര്യാടന് ഷൗക്കത്തും ചേര്ന്നാണ് നിര്മ്മാണം.
ഏറെ സാമൂഹിക പ്രസക്തിയുള്ള പാഠം ഒന്ന് ഒരു വിലാപം, ദൈവനാമത്തില്, വിലാപങ്ങള്ക്കപ്പുറം എന്നീ ചിത്രങ്ങള്ക്കു ശേഷം ആര്യാടന് ഷൗക്കത്ത് കഥയും തിരക്കഥയും സംഭാഷണവും ഒരുക്കുന്ന ചിത്രമാണ് വര്ത്തമാനം. അഴകപ്പന് ഛായാഗ്രഹണവും റഫീക് അഹമ്മദും വിശാല് ജോണ്സണും ഗാനരചനയും നിര്വ്വഹിക്കുന്നു. ബിജിപാല് ആണ് പശ്ചാത്തല സംഗീതം. നേരത്തെ ഫെബ്രുവരി 19ന് ചിത്രം റിലീസ് ചെയ്യുമെന്ന് പ്രഖ്യാപിച്ചിരുന്നെങ്കിലും മാറ്റുകയായിരുന്നു.