മലയാള സിനിമ കണ്ട എക്കാലത്തെയും വലിയ ബോക്സോഫീസ് വിജയം സമ്മാനിച്ച ലൂസിഫറിന്റെ രണ്ടാം ഭാഗം അണിയറയിലൊരുങ്ങുകയാണ്. യുവ താരം പൃഥ്വിരാജ് സുകുമാരന് ആദ്യമായി സംവിധാനം ചെയ്ത ഈ ചിത്രം നിര്മ്മിച്ചിരിക്കുന്നത് ആശീര്വാദ് സിനിമാസിന്റെ ബാനറില് ആന്റണി പെരുമ്പാവൂര് ആണ്.
മുരളി ഗോപി തിരക്കഥ രചിച്ച ഈ ചിത്രത്തില് ഒരു ശ്രദ്ധേയ വേഷം യുവ താരം ടോവിനോ തോമസും അവതരിപ്പിച്ചിരുന്നു. ജതിന് രാംദാസ് എന്നു പേരുള്ള ഒരു യുവ രാഷ്ട്രീയ നേതാവ് ആയാണ് ടോവിനോ തോമസ് ഈ ചിത്രത്തില് എത്തിയത്. ഇപ്പോള് ലുസിഫറിന് ഒരു രണ്ടാം ഭാഗം പ്രഖ്യാപിക്കപ്പെട്ടിരിക്കുന്ന സാഹചര്യത്തില് ടോവിനോ തോമസ് അതിലും ഉണ്ടാകുമോ എന്ന ചോദ്യം പ്രേക്ഷകര് ഉയര്ത്തിയിരുന്നു.
ഇപ്പോഴിതാ ഓണ്ലുക്കേഴ്സ് മീഡിയയുമായുള്ള അഭിമുഖത്തില് ടോവിനോ തോമസ് പറയുന്നത് ജതിന് രാംദാസ് എന്ന കഥാപാത്രം ലുസിഫെര് 2 ആയ എമ്പുരാനില് ഉണ്ടാകും എന്നാണ് തന്റെ പ്രതീക്ഷ എന്നാണ്. മോഹന്ലാല് കഥാപാത്രം ആയ അബ്രഹാം ഖുറേഷിയുടെ കഥയാണ് ഈ രണ്ടാം ഭാഗം പറയുക. ചിത്രത്തില് സംവിധായകന് ആയ പൃഥ്വിരാജ് സുകുമാരനും അഭിനയിക്കും. സയ്യിദ് മസൂദ് എന്ന കഥാപാത്രം ആയാണ് പൃഥ്വിരാജ് ഈ ചിത്രത്തില് എത്തുന്നത്. നൂറു കോടിയോളം രൂപ ആയിരിക്കും ഇതിന്റെ ബജറ്റ് എന്നാണ് സൂചന. അടുത്ത വര്ഷം അവസാനത്തോടെ ഷൂട്ടിംഗ് ആരംഭിക്കുന്ന ഈ ചിത്രം 2021-ല് റിലീസ് ചെയ്യും.