മോഹൻലാലിന്റെ ഏറ്റവും പുതിയ ബ്ലോക്ക്ബസ്റ്റർ ചിത്രമായ ‘തുടരും’ ബോക്സ് ഓഫീസിൽ കുതിപ്പ് തുടരുന്നു. ഇപ്പോഴിതാ മലയാളത്തിൽ ഏറ്റവും കൂടുതൽ കളക്ഷൻ നേടുന്ന ചിത്രം എന്ന നേട്ടമാണ് തുടരും സ്വന്തമാക്കിയിരിക്കുന്നത്. ആകെ 185 കോടിയിൽ അധികം ഇതിനോടകം നേടിയ ചിത്രം 2018നെ വീഴ്‍ത്തി തുടരും കേരള ബോക്സ് ഓഫീസിൽ ഇൻഡസ്ട്രി ഹിറ്റായിരിക്കുകയാണ്. കേരളത്തിൽ നിന്ന് മാത്രമായി 89 കോടി രൂപയിലധികം നേടിയാണ് ‘ തുടരും’ ഇൻഡസ്ട്രി ഹിറ്റ് ആയിരിക്കുന്നത്.
ഒരുപാട് പുതിയ ചിത്രങ്ങൾ റിലീസ് ആയിട്ടും ‘തുടരും’ നടത്തുന്ന കുതിപ്പ് മറികടക്കാൻ പുതിയ ചിത്രങ്ങൾക്ക് സാധിക്കുന്നില്ല എന്ന് തന്നെയാണ് കണക്കുകൾ കാണിക്കുന്നത്. കഴിഞ്ഞ ഇരുപത്തി നാല് മണിക്കൂറിലെ കണക്ക് നോക്കിയാൽ ഒരു ലക്ഷത്തി ഇരുപത്തി ഒരായിരം ടിക്കറ്റുകളാണ് തുടരുമിന്റേതായി വിറ്റഴിഞ്ഞിരിക്കുന്നത്. പ്രമുഖ ബുക്കിംഗ് സൈറ്റായ ബുക്ക് മൈ ഷോയിലെ മാത്രം കണക്കാണിത്.
ഇതോടെ മലയാളത്തിൽ നിന്ന് മാത്രം 100 കോടി സ്വന്തമാക്കാനാണ് ഇനി സിനിമയുടെ ലക്ഷ്യം. ഏപ്രിൽ 25ന് തിയേറ്ററുകളിൽ എത്തിയ ചിത്രം വലിയ പ്രീ റിലീസ് പബ്ലിസിറ്റി ഇല്ലാതെ തന്നെ ആദ്യ ദിനം മുതൽ പ്രേക്ഷകർ ഏറ്റെടുത്തിരുന്നു. തരുൺ മൂർത്തിയുടെ സംവിധാനത്തിൽ എത്തിയ ചിത്രം മോഹൻലാലിന്റെ കരിയറിലെ 360-ാമത്തെ സിനിമയാണ്.
ശോഭനയാണ് നായിക. ഏറെക്കാലത്തിന് ശേഷം ഇരുവരും ഒന്നിക്കുന്നുവെന്ന പ്രത്യേകതയും ചിത്രത്തിനുണ്ട്. ഷണ്മുഖം എന്ന ടാക്‌സി ഡ്രൈവറായാണ് ചിത്രത്തിൽ മോഹൻലാൽ എത്തുന്നത്. ബിനു പപ്പു, ഫർഹാൻ ഫാസിൽ, മണിയൻപിള്ള രാജു എന്നിവർക്കൊപ്പം നിരവധി പുതുമുഖങ്ങളും ചിത്രത്തിൽ അഭിനയിച്ചിട്ടുണ്ട്. ഷാജി കുമാർ ആണ് ഛായാഗ്രഹണം.
