നവാഗതനായ അനില് ലാല് കഥയും സംവിധാനവും ചെയ്യുന്ന ‘സുഗന്ധി’ ഷോര്ട്ട് ഫിലിം ശ്രദ്ധ നേടുന്നു. സുഗന്ധി-ഷിബു എന്ന ദമ്പതികളുടെ കഥയാണ് ചിത്രം പറയുന്നത്. ലിജോ ഉലഹന്നാന്, ഷൈലജ പി. അംബു, സജാദ് ബ്രൈറ്റ്, മൃദുല മോഹന്, പാര്വതി പി.വി, വിനയ്, വിപിന് എസ്. നായര് എന്നിവരാണ് ചിത്രത്തില് പ്രധാന കഥാപാത്രങ്ങളായി എത്തുന്നത്.
ഷിബു സാധാരണക്കാരനായ ഒരു ഇലക്ട്രീഷ്യന് ആണ്. അയാളുടെ കുടുംബജീവിതം ഏറെക്കാലമായി താറുമാറായിരിക്കുന്നു. റബ്ബര് ടാപ്പിംഗ് അടക്കം ഒരു വീട്ടിലെ സര്വ്വജോലിയും ചെയ്യുന്ന സുഗന്ധിയുടെ വിയര്പ്പാണ് ജീവിതത്തില് ഷിബുവിന്റെ താളം തെറ്റിച്ചത്. മകളെ ഓര്ത്ത് സുഗന്ധി ഭര്ത്താവിന്റെ അവഗണന സഹിച്ചു നില്ക്കുന്നു.
എന്നാല് പണിക്ക് പോയ ഒരുദിവസം പൂക്കളുടെ ഗന്ധമുള്ള ഒരു യുവതി ഷിബുവിന്റെ സ്വപ്നങ്ങളിലേക്ക് കടന്ന് വരുന്നു. അവള് സമ്മാനിച്ച അവളുടെ പെര്ഫ്യൂമിന്റെ ഗന്ധത്തിലൂടെ അവള് ഷിബുവിനെ സന്തോഷവാനാക്കുന്നു. സുഹൃത്ത് സണ്ണിയും ഷിബുവിന്റെ വാക്കുകളിലൂടെ അവളുടെ ഗന്ധം ആസ്വദിക്കുന്നുണ്ട്. ഷിബുവിന് പിന്നീട് കാണേണ്ടി വരുന്ന കാഴ്ചകളും അതയാളില് ഉണ്ടാക്കുന്ന മാറ്റങ്ങളും ആണ് ചിത്രം പറയുന്നത്.
സന്തോഷ് അണിമയാണ് ചിത്രത്തിന്റെ ക്യാമറ കൈകാര്യം ചെയ്യുന്നത്. സംഗീതം- സന്ദീപ് സജീവ, എഡിറ്റര്- അരുണ് വൈഗ, ആര്ട്ട്- ശരത്ത് ലാല്, മേക്കപ്പ്- മീര മാക്സ്, കോസ്റ്റ്യൂം- മൃഥുല, സൗണ്ട് ഡിസൈന്- അരുണ് രാമവര്മ്മ, പി.ആര്.ഒ – പി.ശിവപ്രസാദ്, വൈശാഖ് സി വടക്കേവീട്.