നിമിഷ സജയനും രജിഷ വിജയനും പ്രധാന കഥാപാത്രങ്ങളെ അവതരിപ്പിക്കുന്ന സ്റ്റാന്ഡ് അപ്പിന്റെ ഒഫീഷ്യല് ഫിലിം ലോഞ്ച് ഒക്ടോബര് 12-ന് കൊച്ചി അവന്യൂ സെന്ററില് നടന് മമ്മൂട്ടി നിര്വഹിക്കും. ഉമേഷ് ഓമനക്കുട്ടന്റെ തിരക്കഥയിലൊരുങ്ങുന്ന ചിത്രത്തിന്റെ ഛായാഗ്രഹണം ടോബിന് തോമസിന്റേതാണ്. ക്രിസ്റ്റി സെബാസ്റ്റ്യന് എഡിറ്റിംഗും വര്ക്കി സംഗീതസംവിധാനവും നിര്വ്വഹിക്കുന്നു. കവയിത്രി ബിലു പദ്മിനി നാരായണന് ആദ്യമായി സിനിമക്കായി വരികളെഴുതുന്നു എന്ന പ്രത്യേകതയും ചിത്രത്തിനുണ്ട്. സൗണ്ട് ഡിസൈനര് രംഗനാഥ് രവിയടക്കം സംസ്ഥാന ചലച്ചിത്ര അവാര്ഡ് നേടിയ അഞ്ച് പേര് ഒന്നിക്കുന്ന ചിത്രമാണ് സ്റ്റാന്ഡ് അപ്പ്.
നേരത്തെ പുറത്തിറങ്ങിയ ചിത്രത്തിലെ ഒരേ തൂവല് പക്ഷികള് എന്ന് തുടങ്ങുന്ന തീം സോംഗ് ഹിറ്റ് ചാര്ട്ടില് ഇടം നേടിയിരുന്നു. ശ്രുതി ഫിലിപ്പും സയനോര ഫിലിപ്പും വര്ക്കിയും ചേര്ന്നാണ് ഗാനം ആലപിച്ചിരിക്കുന്നത്. ബില്ലു പദ്മിനി നാരായണനും വര്ക്കിയും ചേര്ന്നാണ് ഗാനത്തിന്റെ വരികള് എഴുതിയിരിക്കുന്നത്. ദീര്ഘകാലമായി മാധ്യമ രംഗത്ത് പ്രവര്ത്തിക്കുന്ന വിധു വിന്സെന്റ് 2016-ല് പുറത്തിറങ്ങിയ മാന്ഹോള് എന്ന ചിത്രത്തിലൂടെയാണ് മലയാള സിനിമാരംഗത്തേക്ക് കടന്ന് വരുന്നത്.
ബി.ഉണ്ണികൃഷ്ണനും ആന്റോ ജോസഫും ചേര്ന്നാണ് ചിത്രം നിര്മിക്കുന്നത്. ടോബിന് തോമസാണ് ഛായാഗ്രഹണം. സ്റ്റാന്ഡ് അപ്പ് കൊമേഡിയനായ കീര്ത്തിയുടെയും സുഹൃത്തുക്കളുടെയും ജീവിതത്തില് നടക്കുന്ന ചില സംഭവങ്ങളാണ് ചിത്രത്തിന്റെ പ്രമേയം. അര്ജുന് അശോക്, വെങ്കിടേശ്, സീമ, നിസ്താര് സേഠ്, സജിത മഠത്തില്, ജോളി ചിറയത്ത്, രാജേഷ് ശര്മ്മ, സുനില് സുഖദ, ജുനൈസ്, ദിവ്യാ ഗോപിനാഥന് തുടങ്ങിയ താരങ്ങളും ചിത്രത്തിലെത്തുന്നുണ്ട്.