സിദ്ദിഖും മോഹന്ലാലും വീണ്ടുമൊന്നിക്കുന്ന ബിഗ് ബ്രദര് അണിയറയിലൊരുങ്ങുകയാണ്. ഒരു മാസ് എന്റര്ടെയ്നറായി എത്തുന്ന സിനിമയ്ക്ക് വേണ്ടിയുള്ള കാത്തിരിപ്പിലാണ് ആരാധകരും സിനിമാലോകവും. ഇപ്പോഴിതാ മോഹന്ലാല് എന്ന നടന് മലയാള സിനിമയ്ക്ക് ചെയ്ത സംഭാവനയെ കുറിച്ച് തുറന്നു പറഞ്ഞിരിക്കുകയാണ് സിദ്ദിഖ്.
ലോകവ്യാപകമായി മലയാള സിനിമയുടെ മാര്ക്കറ്റ് വാല്യു വര്ദ്ധിപ്പിച്ചതില് മോഹന്ലാല് എന്ന താരത്തിന് വലിയ പങ്കുണ്ട്. ലാലിനെ സാധാരണക്കാരനായി കാണാനാണ് പലര്ക്കും താത്പര്യമെങ്കിലും സത്യമതല്ല. മോഹന്ലാലിന്റെ സൂപ്പര്ഹീറോ ഇമേജിന് കോട്ടം തട്ടാത്ത സിനിമയായിരിക്കും ബിഗ് ബ്രദര്. എന്നാല് എല്ലാത്തരം പ്രേക്ഷകര്ക്കും ഇഷ്ടമാകുന്ന ലാല് മാനറിസങ്ങള് സിനിമയിലുണ്ടാകും. സിദ്ദിഖ് പറയുന്നു.
സച്ചിദാനന്ദന് എന്ന കഥാപാത്രത്തെയാണ് മോഹന്ലാല് ചിത്രത്തില് അവതരിപ്പിക്കുന്നത്. സല്മാന് ഖാന്റെ സഹോദരന് അര്ബാസ് ഖാനും ചിത്രത്തില് പ്രധാന വേഷത്തിലെത്തുന്നുണ്ട്. വേദാന്തം ഐപിഎസ് എന്ന കഥാപാത്രത്തെയാണ് അര്ബാസ് ചിത്രത്തില് അവതരിപ്പിക്കുന്നത്.
ആക്ഷന് കോമഡി വിഭാഗത്തില് ഒരുങ്ങുന്ന ചിത്രത്തില് മൂന്ന് നായികമാരാണ് അണിനിരക്കുന്നത്. തെന്നിന്ത്യന് നടി റജീന കസാന്ഡ്ര, സത്ന ടൈറ്റസ്, ജനാര്ദ്ദനന്, സിദ്ദിഖ്, വിഷ്ണു ഉണ്ണികൃഷ്ണന്, അനൂപ് മേനോന്, ചെമ്പന് വിനോദ്, ടിനി ടോം, സര്ജാനോ ഖാലിദ് തുടങ്ങിയവരും ചിത്രത്തില് പ്രധാന വേഷങ്ങളിലെത്തുന്നു.