പ്രമുഖ മാസികയായ എംപയര് തയാറാക്കിയ എക്കാലത്തേയും മികച്ച 50 അഭിനേതാക്കളുടെ ലിസ്റ്റില് ഇന്ത്യയുടെ കിംഗ് ഖാന് ഷാരൂഖും. ഈ പട്ടികയിലിടം നേടിയ ഏക ഇന്ത്യന്
താരമാണ് ഷാരൂഖ് ഖാന്. തങ്ങളുടെ ഔദ്യോഗിക പേജിലൂടെയാണ് എംപയര് മാസിക ലിസ്റ്റ് പുറത്തുവിട്ടത്.
നാല് പതിറ്റാണ്ടുകള് നീണ്ട അഭിനയ ജീവിതത്തിലൂടെ കോടിക്കണക്കിന് ആരാധകരേയും നിരവധി ഹിറ്റുകളും സ്വന്തമാക്കിയ ഇന്ത്യന് താരമാണ് ഷാരൂഖ് ഖാന് എന്ന് മാസിക വിശദീകരിക്കുന്നുണ്ട്. വ്യക്തിപ്രഭാവവും
സമ്പൂര്ണ്ണ വൈദഗ്ധ്യവുമാണ് ഷാരൂഖിനെ ഇത്രയും കാലം അഭിനയ ലോകത്ത് നിലനിര്ത്തിയതെന്നും മാസിക പറയുന്നുണ്ട്.
എല്ലാ വിധത്തിലുമുള്ള റോളുകളും ഷാരൂഖ് ഖാന് വഴങ്ങും. അദ്ദേഹത്തിന് സാധിക്കാത്തതായി ഒന്നുമില്ലെന്നും മാസിക പ്രശംസിക്കുന്നു. ഡെന്സല് വാഷിംഗ്ടണ്, ടോം ക്രൂസ്, ഫ്ലോറന്സ് പഗ്, ടോം ഹാങ്ക്സ് എന്നീ താരങ്ങളാണ് ലിസ്റ്റിലെ മറ്റ് പ്രധാനികള്.
രാജ്യത്ത് പത്താന് വിവാദം കത്തുന്നതിനിടെയാണ് ഈ അംഗീകാരം ഷാരൂഖിനെ തേടിയെത്തുന്നത്. പത്താന് ജനുവരിയിലാണ് പുറത്തിറങ്ങുന്നത്. സിദ്ധാര്ഥ് ആനന്ദ് സംവിധാനം ചെയ്യുന്ന ചിത്രത്തില് ഷാരൂഖ് ഖാനും ദീപിക പദുക്കോണിനും പുറമേ ജോണ് എബ്രഹാമും പ്രധാന വെഷത്തിലെത്തുന്നുണ്ട്. ഡിംപിള് കപാഡിയ, ഷാജി ചൗധരി, ഗൗതം, അഷുതോഷ് റാണ തുടങ്ങി ഒട്ടേറെ താരങ്ങളും സിനിമയില് അണിനിരക്കുന്നു. 2023 ജനുവരി 25നാണ് തിയേറ്റര് റിലീസായി സിനിമ എത്തുക. പ്രഖ്യാപിച്ചിരിക്കുന്ന ചിത്രത്തിന്റെ ഡിജിറ്റല് റൈറ്റ്സ് ആമസോണ് പ്രൈമിനാണ്.