ജിത്തു മാധവന്റെ സൂപ്പര് ഹിറ്റ് ചിത്രം ‘രോമാഞ്ച’ത്തിന്റെ ഹിന്ദി റീമേക്ക് ട്രെയ്ലര് ചര്ച്ചയാകുന്നു. ‘കപ്കപി’ എന്ന് പേരിട്ടിരിക്കുന്ന ചിത്രം സംഗീത് ശിവനാണ് സംവിധാനം ചെയ്യുന്നത്. ശ്രേയസ് തല്പാഡെ, തുഷാര് കപൂര്, സിദ്ധി ഇദ്നാനി, സോണിയ റാത്തി, ദിബേന്ദു ഭട്ടാചാര്യ, സാക്കീര് ഹുസൈന് എന്നിവരാണ് ചിത്രത്തില് പ്രധാന വേഷങ്ങളിലെത്തുന്നത്.
അര്ജുന് അശോകന് അവതരിപ്പിച്ച കഥാപാത്രമായി ഹിന്ദിയില് എത്തുന്നത് തുഷാര് കപൂറും സൗബിന്റെ വേഷത്തില് ശ്രേയസ് തല്പാഡെയുമാണ് വേഷമിടുന്നത്. രോമാഞ്ചത്തില് പ്രേതസാന്നിധ്യമായി അവതരിപ്പിക്കുന്ന അനാമിക എന്ന കഥാപാത്രത്തെ രക്തരക്ഷസ് ആക്കിയാണ് ഹിന്ദിയില് അവതരിപ്പിച്ചിരിക്കുന്നത്.
ട്രെയ്ലറിന് വിമര്ശനങ്ങളും ട്രോളുകളുമാണ് കമന്റുകളായി എത്തുന്നത്. ‘മലയാളത്തില് അസാധരണമായ പ്രകടനങ്ങളും മികച്ച കഥ പറച്ചിലും വേറെ ലെവല് കോമഡിയും ആയിരുന്നു, ആ സിനിമയുമായി താരതമ്യം ചെയ്യാനാവില്ല’ എന്നാണ് ഒരാളുടെ കമന്റ്. ‘ചില സിനിമകള് റീമേക്ക് ചെയ്യാന് പാടില്ല എന്നതിന് ഉദാഹരണമാണിത്’ എന്നാണ് മറ്റൊരു കമന്റ്.
മലയാള ചിത്രം സൂപ്പര് ആയിരുന്നു, ഇനി ഹിന്ദി കണ്ടു നോക്കാം എന്നുള്ള കമന്റുികളും എത്തുന്നുണ്ട്. അതേസമയം, ചിത്രം മേയ് 23ന് ചിത്രം തിയേറ്ററുകളിലെത്തും. മെഹക്ക് പട്ടേല് ആണ് ചിത്രത്തിന്റെ സഹനിര്മാതാവ്. ഛായാഗ്രഹണം: ദീപ് സാവന്ത്, തിരക്കഥ: സൗരഭ് ആനന്ദ്കുമാര് പ്രിയദര്ശി, മ്യൂസിക്: അജയ് ജയന്തി, എഡിറ്റര്: ബണ്ടി നാഗി.