‘ആര്‍ഡിഎക്‌സ്’ സിനിമയില്‍ പ്രതിസന്ധി പരിഹരിച്ചെന്ന് ചിത്രത്തിന്റെ അണിയറപ്രവര്‍ത്തകര്‍. ചിത്രത്തിന്റെ സെറ്റില്‍ നിന്നും ഷെയ്ന്‍ നിഗം ഇറങ്ങിപ്പോയെന്ന വാര്‍ത്തകള്‍ പ്രചരിച്ചതിന് പിന്നാലെയാണ് പ്രശ്‌നം പരിഹരിച്ചതായി ചിത്രത്തിന്റെ അണിയറപ്രവര്‍ത്തകര്‍ വ്യക്തമാക്കിയത്.
മുതിര്‍ന്ന താരങ്ങളായ ലാല്‍, ബാബു ആന്റണി, ബൈജു സന്തോഷ് തുടങ്ങിയവരുള്ള ഷൂട്ടിംഗ് സെറ്റില്‍ നിന്ന് ഷെയ്ന്‍ നിഗം അര്‍ധരാത്രി ഇറങ്ങിപ്പോയതു കാരണം ഷൂട്ടിംഗ് മുടങ്ങിയെന്നാണ് പ്രമുഖ സിനിമാ ഗ്രൂപ്പുകളില്‍ പോസ്റ്റുകള്‍ എത്തിയത്.
തനിക്ക് മറ്റു താരങ്ങളെക്കാള്‍ പ്രാധാന്യം നല്‍കണമെന്ന ഷെയ്‌നിന്റെ പിടിവാശിയാണ് പ്രശ്‌നങ്ങള്‍ക്ക് കാരണമെന്നും പ്രചരിച്ച ട്വീറ്റുകളില്‍ പറഞ്ഞിരുന്നു. എന്നാല്‍ ഈ പ്രചാരണങ്ങളോട് ഷെയ്ന്‍ പ്രതികരിച്ചത് ചിത്രത്തിന്റെ ലൊക്കേഷന്‍ വീഡിയോ പങ്കുവച്ച് കൊണ്ടായിരുന്നു.
കഴിഞ്ഞ ദിവസങ്ങളില്‍ നടന്ന പ്രശ്‌നങ്ങള്‍ അണിയറപ്രവര്‍ത്തകരും അസോസിയേഷനും ഇടപെട്ട് പരിഹരിച്ചെന്നും ചിത്രത്തിന്റെ ഷൂട്ടിംഗ് ഏഴ് ദിവസം കൊണ്ട് പൂര്‍ത്തിയാക്കാനാണ് പദ്ധതിയെന്നും അണിയറ പ്രവര്‍ത്തകര്‍ അറിയിച്ചതായാണ് മനോരമ ഓണ്‍ലൈന്‍ റിപ്പോര്‍ട്ട് ചെയ്യുന്നത്.
നവാഗതനായ നഹാസ് ഹിദായത്ത് സംവിധാനം ചെയ്യുന്ന ചിത്രമാണ് ആര്‍ഡിഎക്‌സ്. റോബര്‍ട്ട്, ഡോണി, സേവ്യര്‍ എന്നിങ്ങനെ മൂന്നു സുഹൃത്തുക്കളുടെ കഥയാണ് ചിത്രം. ഷെയ്ന്‍, ആന്റണി വര്‍ഗീസ്, നീരജ് മാധവ് എന്നിവരാണ് ഇതിലെ കേന്ദ്രകഥാപാത്രങ്ങളെ അവതരിപ്പിക്കുന്നത്.