സ്വര്ണ്ണക്കടത്തിനിടെ അറസ്റ്റിലായ കന്നഡ നടി രന്യ റാവുവിനെ തള്ളിപ്പറഞ്ഞ് പിതാവും ഡിജിപിയുമായ കെ രാമചന്ദ്ര റാവു. രന്യ തങ്ങളെ നിരാശപ്പെടുത്തിയെന്നും വിവാഹശേഷം രന്യയെ കണ്ടിട്ടില്ലെന്നും അദ്ദേഹം പറഞ്ഞു. രന്യയുടെയോ ഭര്ത്താവിന്റെയോ ബിസിനസ് ഇടപാടുകളെ കുറിച്ച തങ്ങള്ക്ക് അറിയില്ലെന്നും രാമചന്ദ്ര റാവു ടൈസ് ഓഫ് ഇന്ത്യയോട് പ്രതികരിച്ചു.
നാല് മാസം മുമ്പ് രന്യ ജതിന് ഹുക്കേരിയെ വിവാഹം കഴിച്ചത്. അതിന് ശേഷം അവള് തങ്ങളെ കാണാന് വന്നിട്ടില്ല. മകളുടെയോ ഭര്ത്താവിന്റെയോ ബിസിനസ് ഇടപാടുകളെ കുറിച്ച് തങ്ങള്ക്ക് അറിയില്ല. വാര്ത്ത വലിയ ഞെട്ടലും നിരാശയും ഉണ്ടാക്കി. രന്യ നിരാശപ്പെടുത്തി. ഏതെങ്കിലും തരത്തിലുള്ള നിയമലംഘനം അവളുടെ ഭാഗത്ത് നിന്നുണ്ടായാല് നിയമം അതിന്റെ വഴിക്ക് നടക്കട്ടെ എന്നാണ് രാമചന്ദ്ര റാവു പറയുന്നത്.
അതേസമയം, ആഭരണങ്ങളായി അണിഞ്ഞും മലദ്വാരം ഉള്പ്പെടെയുള്ള ശശീരഭാഗങ്ങളില് ഒളിപ്പിച്ചും 14.8 കിലോ സ്വര്ണമാണ് നടി കടത്താന് ശ്രമിച്ചത്. ഡി.ആര്.ഐ സംഘത്തിന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു അറസ്റ്റ്. കഴിഞ്ഞ 15 ദിവസത്തിനിടെ നടി നാല് തവണയാണ് ദുബായ് യാത്ര നടത്തിയത്.
സ്വര്ണക്കടത്തിന് ഉദ്യോഗസ്ഥരുടെ ആരുടെയെങ്കിലും പിന്തുണ ലഭിച്ചിരുന്നോ അതോ കള്ളക്കടത്ത് പ്രവര്ത്തനത്തിന് അറിയാതെ സഹായിച്ചതാണോ എന്നും അന്വേഷിക്കുന്നുണ്ട്. വിമാനത്താവളത്തില് രന്യ റാവു താന് ഡിജിപിയുടെ മകളാണെന്ന് അവകാശപ്പെടുകയും വീട്ടിലേക്ക് കൊണ്ടുപോകാന് പ്രാദേശിക പോലീസ് ഉദ്യോഗസ്ഥരെ വിളിക്കുകയും ചെയ്തിരുന്നു.