കൊച്ചുമകന് സ്കൂളില് പോകണ്ടെന്ന് വാശി പിടിച്ച് കരഞ്ഞതോടെ അപ്പൂപ്പന്റെ ഡ്യൂട്ടിയുമായി സൂപ്പര് സ്റ്റാര് രജനികാന്ത്. കൊച്ചുമകന്റെ കൈപിടിച്ച് കൂളായി ക്ലാസ് മുറിയിലേക്ക് ആക്കിയിരിക്കുകയാണ് രജനികാന്ത്. രജനികാന്തിന്റെ രണ്ടാമത്തെ മകളും സംവിധായികയുമായ സൗന്ദര്യ രജനികാന്ത് പങ്കുവച്ച ചിത്രങ്ങളാണ് ഇപ്പോള് ആരാധകര് ഏറ്റെടുത്തിരിക്കുന്നത്.
സ്കൂളില് പോവില്ലെന്ന് വാശിപിടിച്ച സൗന്ദര്യയുടെ മകന് വേദിനെ സ്കൂളിലാക്കാന് പോവുന്ന രജനികാന്തിനെയാണ് ചിത്രങ്ങളില് കാണാനാവുക. ”ഇന്ന് രാവിലെ എന്റെ മകനു സ്കൂളില് പോവാന് മടി. അപ്പോള് അവന്റെ പ്രിയപ്പെട്ട സൂപ്പര്ഹീറോ താത്ത തന്നെ അവനെ സ്കൂളിലേക്ക് കൂട്ടികൊണ്ടുപോയി.”
”അപ്പാ, എല്ലാ റോളുകളിലും നിങ്ങളാണ് ഏറ്റവും ബെസ്റ്റ്, അത് ഓഫ് സ്ക്രീനില് ആയാലും ഓണ്സ്ക്രീനിലായാലും” എന്നാണ് സൗന്ദര്യ കുറിച്ചിരിക്കുന്നത്. ബെസ്റ്റ് ഗ്രാന്ഡ് ഫാദര്, ബെസ്റ്റ് ഫാദര് എന്നീ ഹാഷ് ടാഗുകളോടെയാണ് സൗന്ദര്യ ചിത്രങ്ങള് പങ്കിട്ടത്.
ബാബ, മജാ, സണ്ടക്കോഴി, ശിവാജി തുടങ്ങിയ ചിത്രങ്ങളില് അസിസ്റ്റന്റ് ഡയറക്ടറായും ഗ്രാഫിക് ഡിസൈനിംഗ് അസിസ്റ്റന്റ് ആയും പ്രവര്ത്തിച്ചാണ് സൗന്ദര്യ തന്റെ കരിയര് ആരംഭിച്ചത്. ‘കൊച്ചടിയാന്’ എന്ന ചിത്രത്തിലൂടെയാണ് സംവിധായികയായി അരങ്ങേറ്റം കുറിച്ചത്.
ധനുഷ് നായകനായ ‘വേലൈ ഇല്ലാ പട്ടധാരി’ എന്ന ചിത്രത്തിന്റെ സംവിധായികയും സൗന്ദര്യയായിരുന്നു. ഓച്ചര് പിക്ചര് പ്രൊഡക്ഷന്സ് എന്ന പ്രൊഡക്ഷന് കമ്പനി സൗന്ദര്യ സ്ഥാപിച്ചിരുന്നു. അശ്വിന് റാംകുമാര് ആണ് സൗന്ദര്യയുടെ ആദ്യ ഭര്ത്താവ്. ഈ ബന്ധത്തിലുള്ള മകനാണ് വേദ്.