വര്ഷങ്ങള് നീണ്ട കാത്തിരിപ്പിന് ഒടുവിലാണ് ചാക്കോച്ചനും പ്രിയക്കും കുഞ്ഞ് ജനിച്ചത്. ആരാധകര് ഏറെ സന്തോഷത്തോടെയാണ് ഈ വാര്ത്ത സ്വീകരിച്ചത്. പിന്നീട് കുഞ്ഞിന്റെ ആദ്യ ഫോട്ടോയും പേരുമൊക്കെ ഏറെ ആകാംക്ഷയോടെയാണ് ഏറ്റെടുത്തത്. ഇപ്പോള് കുഞ്ചാക്കോയുടെ ലോകം കുഞ്ഞ് ഇസയാണെന്നാണ് പ്രിയ പറയുന്നത്.
“ചാക്കോച്ചന്റെ ലോകം ഇപ്പോള് മോനു ചുറ്റും തിരിഞ്ഞു കൊണ്ടിരിക്കുകയാണ്. കുഞ്ഞിനെ കെട്ടിപ്പിടിച്ചുറക്കുന്നു. എടുത്തു നടക്കുന്നു. ചിലപ്പോള് കുഞ്ഞു കരഞ്ഞാല് ഞാനറിയാറില്ല. പക്ഷേ, ചാക്കോച്ചന് ചാടിയെഴുന്നേല്ക്കും. കുഞ്ഞു വേണമെന്ന മോഹം പരാജയപ്പെടുമ്പോഴെല്ലാം സാരമില്ല, വിഷമിക്കേണ്ട നമ്മള് ഹാപ്പിയായി ഇരുന്നാല് മതിയെന്ന് പറഞ്ഞു കൊണ്ടിരുന്ന ആളാണ്. പക്ഷേ ഇപ്പോള് അവനോടുള്ള ഇഷ്ടം കാണുമ്പോള് ദൈവമേ, ഇത്രയും മോഹം മനസ്സില് ഒളിപ്പിച്ചിട്ടാണോ എന്നെ ആശ്വസിപ്പിച്ചതെന്ന് തിരിച്ചറിയുന്നുണ്ട്.” വനിതയുമായുള്ള അഭിമുഖത്തില് പ്രിയ പറഞ്ഞു.
ഏപ്രില് പതിനേഴിനാണ് കുഞ്ചാക്കോ ബോബന് ആണ്കുഞ്ഞ് ജനിച്ചത്. മകന്റെ കുഞ്ഞിക്കാലുകളുടെ ചിത്രം പങ്കുവെച്ച് താനൊരു അച്ഛനായെന്ന വാര്ത്ത കുഞ്ചാക്കോ ബോബന് തന്നെയാണ് ആരാധകരുമായി പങ്കുവെച്ചത്. 14 വര്ഷം കാത്തിരുന്നു കിട്ടിയ കുഞ്ഞിന് ഇസഹാക്ക് ബോബന് കുഞ്ചാക്കോ എന്നാണ് പേര് നല്കിയിരിക്കുന്നത്.