ഇതിഹാസ സാഹിത്യകാരൻ കൽക്കി കൃഷ്ണമൂർത്തിയുടെ ചരിത്ര നോവലിനെ ആധാരമാക്കി മണിരത്നം ഒരുക്കുന്ന ചിത്രമാണ് പൊന്നിയിൻ സെൽവൻ. മണിരത്നത്തിന്റെ സ്വപ്ന ചിത്രം ‘പൊന്നിയിൻ സെൽവൻ’ ആദ്യഭാഗം തിയേറ്ററിലെത്താൻ ഇനി ദിവസങ്ങൾ മാത്രമാണ് ബാക്കി നിൽക്കുന്നത്. വൻതാരനിര അണിനിരക്കുന്ന ചിത്രം തുടക്കം മുതൽ തന്നെ വാർത്തകളിൽ നിറഞ്ഞു നിന്നിരുന്നു.
വലിയ ബജറ്റിൽ കഥ പറയുന്ന ചിത്രത്തിന്റെ അഡ്വാൻസ് ബുക്കിങ്ങ് ഞായറാഴ്ചയാണ് ആരംഭിച്ചത്. പൊന്നിയിൻ സെൽവൻ പ്രദർശനത്തിനെത്താൻ ദിവസങ്ങൾ മാത്രം ശേഷിക്കുമ്പോൾ ചിത്രത്തിന്റെ അഡ്വാൻസ് ബുക്കിങ് കണക്കുകൾ പുറത്ത് വിട്ടിരിക്കുകയാണ് ട്രേഡ് അനലിസ്റ്റ് രമേശ് ബാല. രണ്ട് ദിവസങ്ങൾ കൊണ്ട് ഒരു കോടി രൂപയ്ക്ക് മുകളിലാണ് സിനിമ അഡ്വാൻസ് ബുക്കിങ്ങിലൂടെ മാത്രം നേടിയിരുക്കുന്നത്.
പൊന്നിയിൻ സെൽവന്റെ തമിഴ്നാട്ടിലെ ആദ്യദിന ടിക്കറ്റുകൾ മുഴുവൻ വിറ്റുപോയതായാണ് റിപ്പോർട്ടിൽ പറയുന്നത്. ഇതുവരെ 78000തിലധികം ടിക്കറ്റുകൾ വിറ്റുപോയെന്ന സൂചനകളുണ്ട്. ഇതേ രീതിയിൽപോകുന്ന പക്ഷം വ്യാഴാഴ്ചയോടെ എട്ട് കോടിയ്ക്ക് മുകളിൽ പ്രീ ബുക്കിങ്ങിലൂടെ സിനിമ കളക്ഷൻ നേടുമെന്നാണ് ട്രേഡ് അനലിസ്റ്റുകളുടെ നിഗമനം. ഈ മാസം 30-നാണ് പൊന്നിയിൻ സെൽവൻ തിയേറ്ററുകളിലെത്തുന്നത്.
കേരളത്തിൽ 250ഓളം തിയേറ്ററുകളിലയി പ്രദർശനത്തിന് എത്തുന്ന ചിത്രത്തിന്റെ കേരളത്തിലെ വിതരണാവകാശം ശ്രീ ഗോകുലം മൂവീസിനാണ്. ചിത്രം മണിരത്നത്തിന്റെ ഉടമസ്ഥതയിലുള്ള മദ്രാസ് ടാക്കീസും ലൈക പ്രൊഡക്ഷനും ചേർന്നാണ് നിർമിച്ചിരിക്കുന്നത്. പത്താം നൂറ്റാണ്ടിൽ, ചോള ചക്രവർത്തിയുടെ സിംഹാസനത്തിന് നേരിടേണ്ടി വന്ന തുടർ പ്രതിസന്ധികളും അപകടങ്ങളും സൈന്യത്തിനും ശത്രുക്കൾക്കും ചതിയന്മാർക്കും ഇടയിൽ നടക്കുന്ന പോരാട്ടങ്ങളുമാണ് പൊന്നിയിൻ സെൽവൻ പറഞ്ഞു വെയ്ക്കുന്നത്.
ചിത്രം ഇതിഹാസ സാഹിത്യകാരൻ കൽക്കി കൃഷ്ണമൂർത്തിയുടെ പ്രസിദ്ധമായ തമിഴ് നോവലിനെ ആധാരമാക്കിയാണ് സിനിമ ഒരുങ്ങുന്നത്. ചോള രാജാവായിരുന്ന അരുൾമൊഴി വർമനെന്ന രാജരാജ ചോളൻ ഒന്നാമനെ കുറിച്ചുള്ളതാണ് 2400 പേജുള്ള ഈ നോവൽ. ആദ്യ ഭാഗത്ത് ടൈറ്റിൽ കഥാപാത്രമായി ജയം രവിയാണ് എത്തുന്നത്. രാജ രാജ ചോഴനായാണ് ജയം രവി അഭിനയിക്കുന്നത്. ആദിത്യ കരികാലന്റെ ഇളയസഹോദരനാണ് അരുൾമൊഴി വർമനെന്ന രാജ രാജ ചോഴൻ.
ആദിത്യ കരികാലനായി എത്തുന്ന വിക്രം, വന്തിയ തേവനായി കാർത്തി, നന്ദിനി രാജകുമാരിയായി ഐശ്വര്യ റായി, കുന്ദവൈ രാഞ്ജിയായി തൃഷ ഐശ്വര്യ ലക്ഷ്മി, റഹ്മാൻ, പ്രഭു, ശരത് കുമാർ, ജയറാം, പ്രകാശ് രാജ്, ലാൽ, വിക്രം പ്രഭു, പാർത്ഥിപൻ, ബാബു ആന്റണി അശ്വിൻ കാകുമാനു, റിയാസ് ഖാൻ, ശോഭിതാ ദുലിപാല, ജയചിത്ര തുടങ്ങി ഒട്ടേറേ അഭിനേതാക്കൾ സിനിമയുടെ ഭാഗമാണ്.