മഹാമാന്ത്രികന് കടമറ്റത്ത് കത്തനാരുടെ ജീവിതം പറയുന്ന ‘കത്തനാര്: ദി വൈല്ഡ് സോര്സറര്’ ചിത്രത്തില് ജയസൂര്യയ്ക്കൊപ്പം നിതീഷ് ഭരദ്വരാജും. പത്മരാജന്റെ ഗന്ധര്വനായി മലയാളി പ്രേക്ഷകര്ക്ക് മുന്നിലെത്തിയ നിതീഷ് ഭരദ്വാജ് 33 വര്ഷത്തിന് ശേഷമാണ് വീണ്ടും മലയാളത്തിലേക്ക് എത്തുന്നത്.
മഹാഭാരതം സീരിയലില് ശ്രീകൃഷ്ണനെ അവതരിപ്പിച്ച് ശ്രദ്ധ നേടിയ താരമാണ് നിതീഷ് ഭരദ്വാജ്. ബോളിവുഡിലും നിരവധി സിനിമകളില് നിതീഷ് അഭിനയിച്ചിട്ടുണ്ട്. ‘കേദാര്നാഥ്’ എന്ന ചിത്രത്തിലാണ് നിതീഷ് ഭരദ്വാജ് ഒടുവില് വേഷമിട്ടത്.
‘ഫിലിപ്സ് ആന്ഡ് ദ മങ്കിപെന്’, ‘ജോ ആന്ഡ് ദ ബോയ്’, ‘ഹോം’ എന്നീ സിനിമകള്ക്ക് ശേഷം റോജിന് തോമസ് സംവിധാനം ചെയ്യുന്ന ബിഗ് ബജറ്റ് ചിത്രമാണ് കത്തനാര്. അനുഷ്ക ഷെട്ടി, പ്രഭുദേവ, സാന്ഡി മാസ്റ്റര്, കുല്പ്രീത് യാദവ്, ഹരീഷ് ഉത്തമന് തുടങ്ങിയ വമ്പന് താരങ്ങളാണ് ചിത്രത്തില് അണിനിരക്കുന്നത്.
സനൂപ് സന്തോഷ്, കോട്ടയം രമേശ്, ദേവിക സഞ്ജയ്, കിരണ് അരവിന്ദാക്ഷന് എന്നീ താരങ്ങളും സിനിമയില് വേഷമിടുന്നുണ്ട്. ഗോകുലം ഗോപാലനാണ് ചിത്രം നിര്മ്മിക്കുന്നത്. ബൈജു ഗോപാലന്, വി.സി. പ്രവീണ് എന്നിവരാണ് കൊ-പ്രൊഡ്യൂസേര്സ്. എക്സിക്യൂട്ടീവ് പ്രൊഡ്യൂസര് കൃഷ്ണമൂര്ത്തി.
വെര്ച്വല് പ്രൊഡക്ഷന് സാങ്കേതികവിദ്യ ഉപയോഗിച്ച് ചിത്രീകരിക്കുന്ന ചിത്രത്തിന്റെ രണ്ട് മിനിറ്റ് ദൈര്ഘ്യം വരുന്ന ഗ്ലിംപ്സ് വീഡിയോ ജയസൂര്യയുടെ പിറന്നാള് ദിനത്തില് പുറത്തുവിട്ടിരുന്നു. വലിയ രീതിയിലുള്ള സ്വീകാര്യതയാണ് ഗ്ലിംപ്സ് വീഡിയോയ്ക്ക് ലഭിച്ചത്.
45000 ചതുരശ്ര അടി വിസ്തീര്ണമുള്ള മോഡുലാര് ചിത്രീകരണ ഫ്ലോറിലാണ് സിനിമയുടെ പ്രധാന ഭാഗങ്ങള് ചിത്രീകരിക്കുന്നത്. മുപ്പത്തില് അധികം ഭാഷകളിലായി റിലീസ് ചെയ്യുന്ന ഒരു ബ്രഹ്മാണ്ഡ ചിത്രമാണിത്. ആര് രാമാനന്ദിന്റെതാണ് തിരക്കഥ. രണ്ട് ഭാഗങ്ങളായി എത്തുന്ന ചിത്രത്തിന്റെ ആദ്യ ഭാഗം 2024ല് റിലീസ് ചെയ്യും.